分手要唱通街 高調分手的3對明星情侶

吳若希之前喺社交平台狂曬富二代男友，點知拍拖短短半年，近日又峰迴路轉喺網上宣布分手，真係一貫佢高調作風⋯⋯之但係到底有無好多人想知佢拍拖同分手呢？其實都有唔少明星情侶分手都要發聲明，不過唔少都係因為太受觀眾矚目，所以先走出嚟同大家交代嘅：

方力申 鄧麗欣（Stephy）

呢Pair人大家都應該好熟悉啦？睇過佢哋愛情三部曲《獨家試愛》、《十分愛》、《我的最愛》，唱K必點佢哋嘅合唱歌：《好心好報》、《好好戀愛》、《十分・愛》、《我的最愛》、《七年》等。講真，觀眾真係可以話見證佢哋十年情，由佢哋地下情到浮面、傳結婚，一早係大家認定嘅金童玉女。可惜觀眾始終係將自己嘅幻想投放咗喺佢哋度，其實金童玉女都一直有問題。Stephy同方力申戀情公開後成日一齊上節目接受訪問，當時Stephy多次提到地下情時偷偷摸摸，無得好似普通情侶咁拍拖，隱約有少少遺憾感覺。而且言談間似乎好多嘢得Stephy放上心，而方力申都仲好似個大��路咁。

或者兩個人唔夠同步，最後都係走到分手呢一步，透過二人所屬嘅太陽娛樂發分手聲明。其後Stephy仲喺自己Facebook發表分手心聲，指「我的世界從來不存在童話」，更對大家道歉說「讓大家失望」。其實一個女生肯默默跟住一個男仔十年，仲要喺最青春時選擇最辛苦嘅地下情，到大家認定你地會結婚先發現身邊人根本無同步過，仲要怕令大家失望而道歉，真心覺得Stephy好堅強又好值得人憐愛，希望佢快啲搵到個好對象啦。

蔡卓妍（阿Sa） 陳偉霆（William）

阿Sa同鄭中基同日宣布結咗婚同離緊婚件事當年真係幾震撼，當時兩人都被指責隱婚。或者因為咁，之後阿Sa同陳偉霆嘅戀情一被蘋果日報披露，佢哋第2日就即刻高調承認戀情。當時因為阿Sa名氣大啲，戀情被指女尊男卑，不被外界睇好。但係兩人就一直恩恩愛愛，仲不時一齊去旅行，懶理外界批評。不過自從William 2014年憑內地劇集《古劍奇譚》大師兄一角爆紅，國內名氣同工作量都大增，兩人開始聚少離多。

最後，兩人喺2015年先後發咗兩個分手聲明，指戀情受到太大壓力，並直指：「我們的愛也不像自己想像中堅固」。不過，今次同阿Sa上次離婚反應完全唔同，當年甚至有網民成立Facebook群組想佢同鄭中基復合，而同Williiam分手，內地網民熱烈慶賀甚至惡意攻擊阿Sa。其實阿Sa兩段感情都維持咗咁多年，最後都係未能開花結果，心情唔多唔少都應該有啲無奈。而且兩次都仲要發聲明向全世界解釋，喺心情低落之際都仲要向公眾交代，其實未必需要去到咁harsh掛？

吳雨霏（Kary） 余文樂

Kary同余文樂由朋友變成情人，兩人歐遊被傳媒發現於是公開戀情，之後多次高調曬恩愛，更被拍得情人節甜蜜約會。不過去到2013年中，多次傳出兩人感情有問題，最後Kary向傳媒發聲明表示已經同余文樂分手，指兩人因了解而和平分手，並且依然係好朋友關係，更係Facebook發表英文分手感受。雖然有指男方花心、女方「逼得太緊」係分手導火線，但兩人都為對方澄清，再見亦是朋友真係幾難得。而且Kary分手之後就再同返青梅竹馬「網球王子」洪立熙（Brian）喺返埋一齊，仲結埋婚好幸福，兜兜轉轉先知道邊個最啱自己。而前度余文樂亦隨即大方送上祝福，能夠和平分手真係幾難得。

圖片來源：鄧麗欣（Stephy）＠Facebook、蔡卓妍（阿Sa） ＠微博、吳雨霏（Kary）＠Facebook、余文樂＠微博