咁凍天氣男人要點著先好 咪俾自己變米芝蓮
天氣一凍，大褸出動，但係男人們，並非一下子就要羽絨上身，更要日日同一件羽絨，搞到日日變米芝蓮出街，認真唔好睇！天氣凍，其實你有更多機會扮得更型！
咪咁悶著羽絨
我知我知，羽絨係好暖，但老老實實，羽絨係零下十度著的衣物，香港凍極都係八度、九度，實在並非必要，有點大材小用的感覺！當然，我知，你會話，著咩衫係你的自由，但是日日著住件羽絨，入地鐵又熱，拎住又大件又麻煩，最緊要未必著得好睇，而且講真，你在街上見到的，九成的人都會變米芝蓮，著得好睇的又有幾多人？
你話你著North Face聯乘版，又或者有件Canada Goose，甚至乎Mocler都的確靚，但係你又買得幾多件，平日返工出街，俾自己多幾個變化仲好啦！
Trench Coat
我相信每個男人的衣櫃入面，都好應該有一件Trench Coat，這是絕對長青，永無過時的單品。不同品牌都有不同的cutting，有的會較修身，讓你可以單穿，有的又或會者可以讓你穿在西裝之上，最重要的是，按你的身高與體型去找一件合適的就可以！Trench Coat易襯又好睇，簡單內襯西裝、裇衫都得，甚至是簡單一件純色tee，就可以是很有型的casual look。有的Trench Coat以防水料製造，在這些總是毛毛雨的冷雨天，就更加方便，不會變濕變重，而且衣領有防風的設計，在強烈季候風之下也可以起到擋風的效果，只要外在一條頸巾，就更有層次與效果。
Tweed西裝
個人而言，極愛Tweed西裝，想玩復古英倫風絕對適合，加一副眼鏡，內裡穿一件earthtone的西裝背心，整個感覺出來了。Tweed中文叫粗花呢，布身夠厚夠粗身，有層次之餘，顏色亦比一般西裝來得特別，在秋冬而言絕對是完美的顏色。而且在香港十度以下左右的天氣，穿一件保暖內衣，一件裇衫、一件西裝背心，再加上Tweed外套，絕對夠頂有餘，最多也是加一條頸巾，就算是八度、九度，問題也不會大！而且給人的感覺比較輕鬆，但卻不太隨便，假日外出、出席戶外酒會活動，這樣打扮都會有更高的吸引度，
Overcoat
呢一種更大路的overcoat更加好應該擁有，上班族大可以揀不太修身的款式，讓你可以在西裝之外加上一件Overcoat，你可以不一定要完全穿上，甚至只需披在肩上，也一樣可以營造出層次感！正如我近來到了零度以下的歐洲地區，裡面是三件頭西裝，也是一樣可以，而且長褸款式夠多，一個冬天，準備兩件，上班日交替穿著也好，一件灰色一件淺啡色，基本上已經可以應付大部份顏色的西裝打扮了！
Causal玩Layer
假使你不用穿西裝上班，也一樣可以有好選擇，穿羽絨一件過，一著好熱，一除又凍，所以利用layer的穿法最好，一來會做到保暖的效果，二來顏色層次更多，更加好睇突出。最重要的是，你可以出入室外室內，又或者是交通工具，只脫其中一件，令身上保有適當衣服保暖，但手上的衣服又不會過份麻煩。個人建議軍褸加牛仔褸最方便，兩件單品相信都是不少男人的basic item，但只要配合一起穿就會有不同效果了！甚至乎牛仔褸在內，外穿overcoat甚至是tweed外套都可以！總之以上的item你衣櫃入面一定要有，冬天唔一定要著羽絨咁悶！
