Yahoo頁問
年輕人情緒病例增加 由iPhone帶來的抑鬱
新iPhone公布面世，又有唔少人已經搶先訂購。智能電話對於現代人嚟講已經不可或缺，就算中、小學生幾乎都一人一部。電話為大家帶嚟方便嘅同時，原來都為社會帶嚟唔少問題。最新醫學期刊《Journal of Abnormal Psychology》就刊登咗美國聖地牙哥大學心理學教授Jean Twenge一項調查，自2005至2017年作研究追蹤，發現使用智能電話，令抑鬱症有年輕化趨勢，甚至好多時年輕人嘅情緒、心思都係被電話所牽動，其中又以女性較為嚴重。
Jean Twenge研究報告指出，年輕人使用電話作日常生活，包括傳短訊、玩社交網體、影相拍片等，令年輕人減少面對面接觸遊玩機會，用短訊比傾電話更多，凡此種種對年輕人成長都有唔好影響。社交模式由Offline變Online，減少咗嘅包括係朋友遊玩時間、約會時間、甚至接觸性愛嘅時間，令年輕人孤獨感增加。
另一原因就係社交網體嘅興起，年輕人幾乎一拎電話上手就係玩社交網體，當中嘅「網上朋友」可能好多，但實際上係咪真正嘅朋友？網上嘅欺凌問題絕對比現實嚴重；現實唔敢講嘅說話，可以輕易係網上吐出，充斥著厭惡、反面嘅評語，唔少年輕人受到網上欺凌或者攻擊，更導致年輕人自殺率上升，問題非常嚴重，不可忽視。
最後一個原因，係直接關係到身體健康，而且不限於年輕人。智能電話出現，可以話令大家24小時機不離手，變相嚴重影響作息時間。幾十年前嘅中、大學生可能午夜12點就上床瞓，但有電話之後，大家又點捨得咁早瞓？網上娛樂眾多，又可以無間斷同朋友Texting，作息時間減少、不定時休息，都係抑鬱症原因之一呢。
科技無可否認係可以令社會進步，硬件不停改進，但社會嘅軟件就係每一位人係咪同時受惠？如何利用科技改善人，無論係身體還是心靈上嘅滿足，絕對係各位科技從業者嘅一大課題。
