想換喉？兩個字：最緊要「順氣」

之前講過，一架車就好似人嘅身體，要靠空氣幫助燃燒，而且呢個呼吸過程有入有出，吸氣無疑非常重要，因為個「鼻哥窿」（即係風隔）決定空氣流量，而空氣愈多燃燒「食物」（即係汽油或柴油）所產嘅生動力就愈大��燒完之後，廢氣當然要排出體外，如果係人體，就會通過氣管呼番出嚟，咁車又點樣排氣？咪就係靠套死氣喉囉。

有冇諗過死氣喉都可以做音響？意大利就人用V8引擎嘅其中一邊死氣蕉改成喇叭。（圖：iXOOST）

汽車嘅排氣系統並唔係一條過嘅死氣喉，舉個例，最普遍嘅四汽缸引擎，除咗有俗稱「生氣批」嘅風箱同進氣歧管之外，亦都有另一梳排氣用嘅「死氣蕉」。之所以叫佢做蕉，係因為呢揪歧管嘅造型彎彎曲曲，十足一梳蕉咁。點解要扭到咁？其實係要盡量令每一條管嘅長度都相同，所以要扭曲走位。

又長又直嘅死氣蕉，可以改善排氣效率，呢梳係本田Integra Type-R嘅頭蕉。（圖：Japspeed）

同進氣系統一樣，死氣蕉愈迂迴，空氣流動就唔暢順，所以好多人都唔鍾意用原裝蕉，寧願換過揪after market改裝蕉，因為大部分改裝蕉都會拉得長啲、直啲，排氣會暢順好多。另外，車廠為咗控制成本，都會用生鐵鑄造原裝蕉，係就係襟啲，不過非常重，而且會生鏽。坊間好多改裝蕉都會用不鏽鋼，輕到單手都可以舉起，表面仲拋到光光滑滑，有啲仲鍍上鈦合金，打開頭冚閃閃令，好鬼醒神。

Civic Type-R（FN2）嘅蕉連頭段，細心留意就睇得出係4-2-1設計。（圖：Toda Racing）

鋼蕉仲有一個特點，就係內壁會比原裝蕉平滑，唔好睇少呢一環，內壁唔夠滑會產生亂流，影響排氣效率。當然，呢個要去到發燒程度先有咁高要求。仲有，鋼蕉就好似一件樂器，當有風通過會發出特別響亮嘅聲音，呢樣亦係比原裝蕉巴閉之處，淨係靠把聲都知你架車有料到。

呢款4-1蕉用不鏽鋼造，專為MINI Cooper S嘅增壓引擎而設（圖：Quicksilver）

除咗長度同物料，蕉嘅形狀都會影響性能。又用最常見嘅四汽缸引擎為例，每個汽缸有一個排氣口，即係總共4個，死氣蕉可以有兩種形狀，例如4條直接駁埋一齊，俗稱4出1（4-1）；或者分兩段，即係分成兩組，每2個駁埋再匯合成1條，即係4出2出1（4-2-1），直四仲有冇其他排法？暫時未見過，一般街車都係呢兩種。

4-1同4-2-1點樣選擇？咁就視乎引擎特性同你想點玩。如果副偈係屬於高轉型，即係下下要上到五、六甚至七千轉先有料到，好似啲VTEC同轉子引擎，咁用4-1會適合啲，因為高轉會產生大量廢氣，而少咗一截分流，排氣過程會直接同暢順啲，唔會俗住頂翻轉頭，轉數都會上得快啲；不過調翻轉諗，低轉就可能pick-up得慢啲，頭段表現會有啲影響；如果你想玩頭段加速，或者副偈高轉冇乜扭力，咁就用4-2-1好啲，保留番個回壓，頭、中段加速力會實在啲。

有金屬幻彩色嘅尾鼓，多數係用鈦金屬所造，經高溫處理之後變成咁靚嘅顏色。（圖：J’s Racing）

有冇兩全其美？其實而家啲新車大多數有Turbo或者supercharger，低轉扭力真係唔駛擔心，所以用4-1都唔會搞到頭段冇力。不過，除咗梳蕉之外，成套尾喉其實仲包括催化、中喉同尾鼓，一般輕度改裝都係換死氣蕉同尾鼓，稍為理順一下排氣，同埋加強聲勢。中喉如果改直出，唔單只把聲會好嘈，空氣流量太多或會導致失壓太多，有可能令頭、中段加速力變得冇力；而換假催化就唔多贊成喇，又嘈又唔環保而且過唔到驗車……明嘅，當玩車玩到一個地步，真係乜都想試下，係都留番落track先試，太張揚俾人投訴就唔好啦。