【愛情】聖誕有緣人催運術

年年都聽lonely Christmas，今年有啲機會唔洗單拖過聖誕節，約到佢出嚟，當然要把握機會，係呢啲咁凍咁需要温暖嘅日子…表白啦！表白唔係隨便講句我愛你就得，要有策略， 而家分享幾個例子俾大家，除咗可以跟住做，仲要有創意啊！

(歌都有得唱嘅)幸福摩天輪
天荒地老流連在摩天輪嘛，咁浪漫嘅地方，當然 唔係特首同年青人談判嘅地方啦，今年中環期間限定嘅摩天輪當然係表白嘅熱門景點啦，聽講呢，好多女仔都有啲畏高，一上摩天輪就已經有啲緊張，所以呢個二人獨處嘅空間絕對係佔盡地理之利。

温提：氣氛都好重要架，想佢更加感動嘅話，校正日落時份就快亮燈嘅一刻同佢講心底話，兩人感情都即刻「亮燈」。

(永不過時同總有人感動嘅) 街頭示愛
愛情呢啲嘢，有啲女仔特別鍾意驚喜難忘嘅浪漫嘢，如果你同佢又咁啱鍾意呢啲，大龍鳳式示愛方式可能Work，與其想騎劫朋友搞嘅聖誕Party公開示愛，不如試下就玩到上街，宜家街頭咁多賣唱文青，揾個friend出街「擺檔」，預先夾好再帶女仔行到附近，上演一場冧歌有情人街頭示愛。

温提：胆量固然重要，更重要係練好啲首歌，識彈結他絕對加分。

(邊度都有)星空下的戀人
約佢喺有270－360度夜景view嘅餐廳食餐飯，咁有計劃自然喺佢心裡面加分，不過就算book唔到枱，或者你只係學生哥花唔起千幾蚊食餐飯，都仲有方法嘅…唔一定要去人多嘅太平山睇夜景，揾個寧靜舒服、可以睇見一大片星空嘅地方同佢表白。

温提：make sure著夠衫，要預埋除件外套比佢著住，天氣咁凍著住你件衫，最簡單又窩心嘅浪漫…

圖片來源：
flickr: https://www.flickr.com/photos/willfolsom/6565908949