【憂鬱星期一】英研究：打工仔1星期返3日最有效率

今日又係星期一啦，相信個個打工仔今朝心情都好差，點都提唔起勁做嘢啦？梗係啦，難得放完兩日假又要返，真係未收拾好心情返工呀⋯⋯更唔好講嗰啲6或者7天工作嘅人，說好的標準工時呢？

講真，老細你要人返咁多日，每日朝9晚6，仲未計OT，有無諗過其實反而降低工作效率呢？英國公司HSS Hire做咗個調查，訪問咗2,000個打工仔，反而其實一星期入面得3日係做嘢最有效率，如果天氣太熱，仲會跌到落2.5日。而當中星期二最高效率，星期五就最低效率。Chur足四日，星期五梗係忍唔住hea吓啦，你估我係鐵人可以日日都做得咁快咩？

而一日之中，朝早10：23分係最有精神最做得嘢。梗係啦，琴晚OT到12點先返到屋企，沖完涼吹埋頭都1點啦，第2朝又要7點起身趕返工，返到嚟飲杯咖啡醒醒神，1個半鐘到咪終於有精神做嘢囉，咁其實不如你畀我晏啲返仲好啦⋯⋯而晏就2:02分就最無效率，因為岩岩食飽飽，食完梗係想訓啦～

另外，班打工仔都承認返工有15分鐘同人吹水打吓牙骹，14分鐘上網Hea，8分鐘去沖茶沖咖啡。加加減減之後，平均1日真係做到嘢嘅時間係4小時25分鐘，但如果天氣熱就會減至3小時49分鐘。原來天氣熱都影響效率，40%受訪者話天時暑熱，同事脾氣都差啲，亦都會更加Hea做。

嗱，老細你聽到啦？與其迫我地返足咁多日又唔係真係做嘢，不如你推行3天工作周，一係就縮短每日返工時間，唔係我哋都係返嚟Hea有咩意思？同埋宜家夏天，真係好熱，唔該唔好慳冷氣費，謝謝。