懷舊過中秋 7大美食回憶
今時今日過中秋 —— 公園唔俾玩蠟燭、怕紙燈籠惹火小朋友一人一個膠燈籠、家家戶戶月餅多到食唔完，卻少了有故事的傳統應節美食…… 中秋氣氛已不復當年，以下這些關於「食」的中秋回憶，除非你係90或00後，否則一定會邊讀邊點頭，想一想，舊時月亮，真的好似特別圓。
1. 豬籠餅 (或豬仔餅)
這50，60年代的產物，本以為失傳。近年卻乘著懷舊熱潮再翻生！不少大品牌都重新推出豬籠餅當gimmick。其實豬籠餅是以前製餅師傅拿來測試爐溫的麵糰，說得上是月餅的副產品，成份只有麵粉、砂糖、雞蛋、花生油。後來廠家聽說有人喜歡吃，物盡其用，索性拿來做月餅的贈品，豬仔餅才開始慢慢普及。
以前的豬籠餅，只是一塊焗至金黃色的麵糰，因為用五顏六色的小膠籃套著，才會叫做「豬籠餅」，聽說是寓意六畜興旺。至於味道，就像食月餅皮，甜甜地，少少酥香，不過無餡料，吃多幾件就難免口寡寡了。
近年的豬籠餅經過改良，全部都有真的有精緻的豬仔造型。
也不只有豬仔，魚仔造型一樣有人buy。
時至今日，豬籠餅只是統稱，其實什麼造型都可以了。
2. 月餅會
70年代盛極一時的「月餅會」，簡單來說，就是分期付款買月餅。因為當時家家戶戶都會買月餅送禮，一買最少三數盒，卻非人人都可以負擔得來，因此就會以月供形式付款。一到中秋，餅舖門口就會人山人海，人人爭著攞餅，這盛況到今天已不復見。
當時的月餅全部人手製，數量有限。因此供月餅會另一大好處，是可以肯定中秋時一定「有餅在手」。聽說月餅會最盛之時，如果不供餅會，隨時有錢都買唔到月餅！好誇張。
今時今日的月餅廣告連外星人都會出場，想當年，100%人手繪畫的poster，宣傳��張，會不會來得更人性，更溫暖？
50至70年代人人供的月餅會，到今天只剩下幾家老字號餅舖仍然有此服務，對象都是些幫襯了幾十年的老顧客了。
3. 柚皮燈籠
舊時環境唔好，掛在文具舖店門前的膠公仔燈籠，好多時只可遠觀，阿媽點會隨便買！細路想玩燈籠？一係用學校美術堂自己DIY那個甩皮甩骨的紙燈籠，一係就(通常由阿爸教)用食剩的碌柚皮做燈籠。
做法好簡單，用竹籤穿好，用繩綁穩，在柚皮底放蠟燭。一來唔怕著火，二來燒起來時又聞到陣陣柚香。絕對比現時一式一樣的膠燈籠有性格得多！
在柚皮身上多挖幾個窿，燭光照得更光。
4. 五仁月餅
今日被視為老土的五仁月餅，早在蓮蓉月餅成為主流前，才是當時最流行的款式。餡料由5種果仁(合桃/瓜子/芝麻/杏仁/欖仁)配上肥豬肉(稱為「金華火腿女月」)，手搓而成。入口時吃到絲絲帶油香的火腿、粒粒果仁，與啖啖香甜的蓮蓉完全不同。
後生一輩可能未食過，但阿爸阿媽等長輩一聽到「五仁」，即刻流口水，愛其肥膩甘香。佼佼者就係元朗老字號<大同老餅家>的五仁月餅。
「五仁」也非指定配金華火腿，配臘腸、蠔豉都可以，不過就只在50,60年代才找到了。
5. 菱角
愈來愈少人認識的「菱角」其實是傳統中秋必備的美食。這種秋天成熟的果實，兩頭有角，果肉白色，用清水或鹽水煮熟後，剝殼當零食吃。至於何解中秋要食菱角？聽說是因為取「菱」的諧音「伶」，希望小孩吃了菱角，聰明伶俐囉。
6. 芋頭
舊時在家煮中秋節晚飯，席上一定有「芋頭」菜式。聽說是因為元末時有說「剝芋頭 = 剝鬼皮」，取其消災辟邪，積福之意思。
7. 湯丸
那邊廂月餅花款百出，這邊廂的湯丸依舊，芝麻/花生，簡簡單單，團團圓圓。
圖片：網上圖片、openrice
