戀愛系：現代陶淵明？隱世唔上網一年 會變成點？

喺現今科技發達嘅社會，每人都幾乎用緊多個唔同嘅社交網站，如果話每日用最多時間嘅話，相信都一定流連喺社交網站。大家識朋友，已經唔再係拎電話，反而直接喺戶口到Add人；但估唔到一旦遇到有人完全無社交媒體，真係嚇到人牙骹都跌埋！但原來喺美國就有人做緊呢種「現代陶淵明」，呢位仁兄Erik Hagerman自從去年Donald Trump當選後大受打擊，然後決定唔再睇新聞同唔再上社交網站。每日就係從屋企農莊出發，開半個鐘車出咖啡館食早餐，仲要全程戴隔音耳塞，確保唔會聽到人談論任何新聞。一年之後，Erik雖然話生活比較奄悶，但的確有效調理心情，身心都健康咗咁話；假如閣下可以試下遠離社交媒體，可能都會有以下奇功。

心平氣和

逃跑可恥但有用，喺香港面對每日唔知幾多荒謬嘅事情發生，真係睇到人都炆晒，一離開社交媒體及新聞，保證令人心平氣和唔少，唔會為咗呢啲事而發火。當然啦，太離地，畀人嘅感覺都唔係太好嘅！

培養興趣

大家每日用幾多時間喺網上呢？相信除咗返工做嘢之外嘅時間大家都係機不離手，所以每日都要用大量時間上網，一旦可以脫離使用社交網絡，保證可以讓出勁多時間做自己希望去做嘅事。

身體健康

係人都知早睡早起係身體健康不二法門，但目前大部分都放咗工返屋企都拎住手機上網唔願瞓，玩到半夜先入睡，第二朝又晨雞咁早起身返工；一旦無手機要玩，一定係日出而作，日入而息！