戀愛系：辦公室變出軌良機 過半打工仔認曾跟同事發生性關係

現代人返工時間隨時多過返屋企，理所當然每星期見同事多過朋友、甚至家人；所以好多時戀情都發生喺公司。不過，所謂嘅戀情，更多時不過係肉體上嘅關係；係咪想講一句：「車，你估拍戲咩，邊有咁易呀。」咁大家可能要睇下呢個調查，Business Insider就公佈一個調查，訪問咗2,500位打工仔，竟然有54%曾經同同事發生肉體關係！另外有85%人話「與同事發生關係應該係情有可原」；而64%人更加話曾經嘗試過去勾引同事發生性關係。調查團隊就認為，公司同事間發生關係嘅主因，有以下：

不涉感情只純肉慾

喺公司嘅同事，好多時明知對方有伴侶，就係因為呢種心態，確保大家只係肉體上尋求歡愉；唔會牽涉到真感情。更加唔會有抽唔到身傷感情等問題，當然就係理想偷食場地。

日久生情

對於呢點，應該無咩人會反對，日見夜見之下當然容易發生感情，而且無論係同級，或者上下屬關係，好容易都會因為日久共事而產生感情，例如對上司不自覺傾慕，對同事嘅幫忙感到喜歡咁。

機會太多

同事間偷食機會真係大把，例如一齊放工，一齊食飯，甚至有機會一齊出差嘅話，都係約都唔使約嘅偷食良機，對於定力比較差嘅人嚟講，好容易受唔住引誘就出軌架喇！