戀愛系：中國單身人口達2億 最常出Pool方法竟然係咁？

香港嘅男女比例失衡，女多男少，而且好唔公平嘅係，單身男人就叫「鑽石王老五」；但女人呢？就被叫成「剩女」，公平咩公平咩！除咗香港，北望神州，大陸嘅單身人士一樣勁多（唔係都唔會有「11月11日」光棍節啦）。根據最新數字，大陸單身人士高達2億！其中適婚年齡之中嘅男女，有2,000萬人係獨居。呢個數字都咪話唔驚人，13億人口之中竟然有2億單身！要脫離單身，主要係透過以下幾種方法：

第五位：相睇 （12%）

無錯就係類似Speed Dating，不過大陸目前最興嘅係「一對一8分鐘相親」，即係每個單對單見面8分鐘，唔啱就轉下一個。

第四位：同學聚會 （14%）

無錯喇，原來好多人靠舊同學聚會出Pool，當年嘅校花校草，可能突然再次出現自己眼前，突然變得觸手可及，好刺激！

第三位：交友網站 （20%）

有20%人出Pool竟然係靠上網！原來「網上無真愛」已經Out晒；嗱，不過成功咗就話講得出嚟，仲有無數被騙個案無人知咋！

第二位：公司 （23%）

返工時間比留喺屋企時間仲多，對同事時間比家人朋友要多；所以日久生情，喺公司搵到另一半嘅機會都大增。

第一位：親友介紹 （31%）

講咁耐，原來最有效嘅方法，始終係靠三姑六婆、豬朋狗友嘅介紹！咁的確嘅，識人介紹，信心都大好多啦！