戀愛系：原來自己一個更開心？3成人經常感覺孤獨

人類係好奇怪嘅動物，人嘅感覺，同實際上嘅處境，未必就係一樣；最簡單嘅例子係好多人雖然係經成一個人獨來獨往，但其實佢唔會感覺到孤單；相反有好多人經常係一群之中嘅一份子，偏偏常常感到孤單。英國BBC一項調查指查，18至24歲嘅年輕人之中，竟然有31%嘅經常感到孤單。有呢種感覺嘅人，唔一定係單身人士，因為有好多有伴侶有朋友嘅年輕人，都會照樣覺得孤單，因為覺得無人明白自己，甚至覺得自己孤單係因為「天生如此」。調查員指呢種感覺可大可細，甚至會有人強迫令自己唔會感到開心，不知不覺間令自己變成「天煞孤星」。

同樣嘅問題，原來會隨年齡而下跌，成年人之中只有7%人經常覺得孤單，而65歲或以上嘅老人，就只有10%。即係話，反而生活應該係最多采多姿嘅年輕人，先係最經常被孤單侵襲嘅一份子。調查員又講到，年輕人目前面對嘅壓力愈嚟愈大，除咗讀書之外，仲有生活上嘅壓力，例如英國同樣面對高樓價問題，加上脫歐在即，經濟不就，感到前途糢糊之下，前路茫茫，因此比過往咁多代年輕人更覺得孤單。如果將調查放喺香港，其實何嘗唔係，問心一句，你有覺得有幾人真正了解你？你又有無坦言將自己內心一切向另一半傾訴？還是都係默默飾演住自己？