戀愛系：甩頭髮 嚟得突然3個月由濃密變禿

男人嘅公敵，唔使問就係甩頭髮，不過甩頭髮同絕症差唔多，即係點？第一，多數無得救；第二，嚟得好突然；第三，通常未嚟之前大家都會諗「邊會係我吖」。原來甩頭髮真係殺你一個措手不及。有討論區有男網民就話，自己3個月前頭髮勁濃密，但唔知點解開始甩頭髮，3個月之後頭髮已經變得好薄，而且髮線向上移；話估唔到自己居然都會受脫髮之苦。唔少網民就教路，除咗食藥或者織髮之外，有咩解救放法，你哋睇下啱唔啱用。

練大隻再剷青

既然要甩，就不如狠下心腸，直接剷青；但好多人都會覺得自己Skin Head唔好睇，例如似賊、似生Cancer之類；所以大家一定要配合埋健身變大隻，咁就合乎晒呢個陽光大男孩嘅形象。

辭工嘆世界

另外一個方法就係要放低所有壓力，因為突然甩頭髮好可能係壓力緣故，造成荷爾蒙失調；所以如果條件允許，不如辭職或者停工一排，令個人減壓一下先，當然如果辭職會手停口停，反而令你壓力大增，就咪啦！

良好生活習慣

好多健康問題都係由於人嘅唔健康生活習慣，好基本就係唔夠瞓，成日挨夜，非常傷身；另外平日多肉少菜，餐餐出去食，亦係極度唔健康，令到身體質素變得愈嚟愈差，甩頭髮只係打響警號咋！