戀愛系：返咗工先話自己一早有身孕 算唔算有違道德？

香港地做人難，做人母親再難，因為咩都係錢，要提供一個好環境畀BB，當然要講財才；所以香港有大量全職媽媽。不過近日新西蘭女總理大肚一事，就竟然發酵成為女性職場不公平待遇問題喎。事緣呢位新女總理Jacinda只有37歲，喺3個月前上任成為有史以來國家最年輕總理。直至近日宣佈懷有身孕，並且話係選舉前7日已經知自己有身孕，之後放產假期間會由副總理署理職務。但就隨即引來反對黨及當時競選對手嘅反擊，認為Jacinda存心隱瞞，仲話「女性見工時，僱主也希望求職者透露自己有沒有身孕，又或者有沒有計劃會生產。」結果當然引起社會反嚮，尤其係關注在職媽媽嘅人士及女權份子。雖然唔係有法例規定，但究竟見工時唔透露有身孕算唔算有問題？

有問題：

有唔少人話女性生仔會有產假，某程度上已經係加重其他同事負擔，只不過道德上法例上係應該嘅；但如果道德上係應該予女性產假，同樣地女性道德上亦應知會未來僱主自己有無身孕，等對方有準備好Backup，以免突然請到你返去做一個月就要走。

無問題：

身孕係女性個人私隱，根本無需要透露，何況老土啲講，都怕小氣唔敢講。況且見工應該係講個人能力及經驗，其他種種篩選都係唔應該同埋唔公平嘅，咁又何必要講？唔好忘記呢個世界仲有好多公司依然有歧視問題，如果因為有身孕而不被聘用，好唔抵啫！