戀愛系：2018婚宴人情公價出爐 想回本？難啲囉！

踏入豬年，新正頭如果諗2018成婚嘅男女，相信都已經落手落腳籌備婚事。不過要擺酒就當然一早Book定；每年都有人談及去飲嘅人情公價，雖然唔少人都會話去飲畀利是係隨心，係祝賀，不過人情公價依然係好多人參考嘅指標。可惜今年新人們就有啲失望，事關今年人情公價，除咗Cocktail Party由$500加至$600 、高級酒樓／一般酒店各加$100之外，其餘嘅都係無變。面對年年加價嘅酒席，人情卻唔加，即係隨時變蝕錢。不過討論區一大堆網民就搶住幫呢班新人「開年」，認為畀幾多錢都好，都係心意至上，咪左計右計。咁至於一般新人嚟講，好多其實都係諗住借酒席去「賺錢」，畢竟結婚用咗咁多，都想有啲幫補下嘛。面對呢一廂情願嘅新人，就最令人勞氣；唔知大家又對去飲有咩睇法呢？

畀錢睇Show

好多人被人炸，其實同一對新人真係唔係太熟，咁去到放低人情就惟有當睇真人騷，不過分別係呢啲Show大同小異，只係人物唔同咗，睇得多其實無晒感覺，只係留意下條魚好唔好食，隻雞入唔入味。

真心恭賀

呢啲真心朋友少之又少，多數都係識於微時嘅真朋友，放低人情絕對唔會少，而且覺得係有錢出錢，有力出力，絕對唔計較；人生有呢啲朋友，唔使多，幾個就已經如願足已啦！

只為懾位

好多人都覺得，新人請自己，其實都係為咗圍數，儲夠一枱唔會蝕；呢啲朋友被左懾右懾去三唔識七嘅枱入面自生自滅；老實講，新人連你有無去過都唔會有印象，呢啲人識趣又大方嘅乾脆門口放低人情就直接走人。