是日噏day：啊～！你老友匿埋喺度食鮑魚啊！

新聞琴日爆出一單3個港女喺台灣上引水產，偷偷將鮑魚、生蠔、牡丹蝦放入衣袋，混入去廁所就地正法大拆一餐嘅事件。

大眾對呢件事嘅反應迴響之所以咁大，主要其實唔係因為犯法，而係因為呢個犯法行為，係下賤之中嘅下賤，亦係豬一般嘅隊友。

當然，犯法就係犯法，呢一點毋庸置疑。但係法律以外，犯罪本身亦有道德嘅高低之分。有時候，法係犯咗，但係品德可以唔低賤。比方說，極端啲講，一個貧窮嘅母親，如果因為唔忍心自己嘅細路捱餓而偷麵包。我哋會話佢犯咗法，但唔會話佢賤。

咁，同樣都係偷嘢，點解呢3個介乎21至25歲嘅港女，品德之下賤，足以令人側目呢？

首先，係因為佢哋犯嘅罪，純粹係因為貪。3個樣貌標緻（雖然有人話3個女仔一係就係親生姊妹，一係就好可能用埋同一個醫生），其中一個據聞係從事保險業。好眉好貌，唔係無錢俾，但係純粹係貪果幾千蚊食費想free，做埋啲鼠竊狗偷野，嗰個貪念，係完全冇迫切性，即是，係一種純粹自甘墮落嘅貪念。

第二，貪，都有分你貪嘅係啲咩。

如果你係走去偷鑽石名錶，轉手賣返出去賺返幾十萬，又或者退而求其次偷啲低檔野，賣返出去就算不同係一百幾千，都叫有啲志氣都叫求財。但係3位大姐，你唔貪D賣得返出去嘅嘢，而係貪埋啲食咗落去就冇嘅所謂好西，即係你純粹為食，貪享受。喂大佬你有冇咁餓先？人偷嘢你偷野，俾少少志氣偷D等駛野得唔得？

第三，就算真係咁cheap，就係貪吃貪到偷都要偷黎食，又可唔可以俾返小小品味我，唔好拎啲生嘅食物，走入個一個公廁入面狂隊呢？

我諗果幾件極品鮑魚同埋生蠔，都非常唔願意自己最後，係俾人拎入公廁入面隊，好核突囉大佬！既然你嘅貪念係源自於「享受美食」，可唔可以保持番少少「享受美食」嘅原則我，搵一個proper嘅地方慢慢「享用」，而唔係喺屎坑極速狂吞先？好樣衰啊！

第四，就算你真係咁核突要去廁所入便偷偷隊生猛海產，又可唔可以唔好咁豬兜，將啲價錢標籤啊、食物包裝啊，直接掉喺廁所個垃圾桶，俾人輕易揭穿呢？
報道話上引水產個保安自己都講，年中應該都有唔少呢類手腳唔乾淨嘅食客，但人贓並獲嘅，係少到幾乎冇。

但係呢3位天才，居然有辦法留低犯罪線索喺屎坑現場之餘，仲有幾件食物食唔晒，放喺衫袋俾人人贓並獲。你知道嗎？蠢，都係一條非常大嘅罪行黎架。

第五，好，我當你3條女平時就係咁cheap ，天性又就係咁蠢架嘞，人生冥冥之中，無論如何都會瀨一單咁肉酸嘅事，你哋又介唔介意，留返喺香港先做樣咁cheap嘅嘢，唔好去到台灣人哋國家先爆件咁嘅事出嚟呢？

我承認，我確實係有華人「家醜不出外傳」嘅老土思維。但係當成個亞洲地區，都諗緊點樣可以追得上近代日本嗰個level嘅公民質素之時，你又何必喺一個公民質素相對較高嘅華人國家，粗暴地展示香港人可以有幾cheap，同時又可以去到幾蠢呢？雖然，最有樣辦效果俾台灣人覺得香港唔掂嘅，係以梁先生為首嗰一班人嘅最大功勞，而唔係你3位。

但係又賤又蠢嘅香港賊，真係多一個都嫌太多囉！

text by 泰兄

（圖片來源： 網絡圖片）