是日噏day：女人口不對心嘅時候諗緊咩，男人到底知唔知？

Cafe之內，店員播放《小幸運》嘅YouTube MV，田馥甄未唱歌之前有段獨白，是咁的——

很久很久以後我們才知道，

當一個女孩說她再也不理你

不是真的討厭你

而是很在乎你

非常非常在乎你

成枱人幾丁友啱啱放工，本身攰到傾計都嫌費事，直至聽到呢段獨白，

男友人A似乎感覺到話題來了，向在座嘅女士挑機地問：「其實你哋女人口不對心嘅嗰個moment，個腦究竟係諗緊咩架呢？」

出名巴辣嘅女友人B，食完最尾一口carbonara，清一清喉嚨煞有介事地答：「容許我暫時代表大部份女性，講解下點解我哋講嘢有時要口不對心。因為好多時有啲嘢，如果要我地講到出聲，畫公仔畫到出腸你哋先識得講、識得做，其實已經完全冇意思囉！」

朋友A：「點解想你哋女人解釋一下有咩要求再去滿足你嘅需求，係冇意思呢？」

女友人C亦不是省油的燈，搶先答道：「其實如果你哋男人係有心嘅話，嗰啲嘢唔會諗唔到囉。

如果你係關心一個人，你就會知道佢性格係點，日常生活遇到唔同嘅情況，你都會估到個女仔有咩係鍾意，有咩係唔鍾意，唔會唔知道。

而大部份嘅情況，例如我同我男朋友咁，我覺得佢其實冇可能唔知我心底諗咩，但係佢偏偏唔做咋嘛，根本係扮嘢。」

大學時修讀哲學，現職於金融機構嘅男友人D接口道：「你哋嘅意思，會唔會係——男人如果真係唔知道女人口不對心嘅時候諗咩，即係唔關心自己女朋友，係最差嘅一種男人；而比較多嘅情況係，大部份男人係未衰到貼地嘅，其實佢哋心底裏面，係知道你哋口不對心嘅時候係諗緊咩，不過，佢哋詐唔知嘅啫。——係咪咁呢？」

在座3位女性，包括一直冇出聲嘅女友人E， 不約而同地表示：「exactly！」

在座3位男士包括我，你眼望我眼，搖搖頭交換左一個覺得不可思議嘅笑容。

朋友A開始解釋：「首先，你哋必須要相信，我啱啱問你地女人口不對心嘅時候究竟諗咩，係的確真誠地想知你哋諗緊咩，而唔係，明知你哋諗緊咩，詐唔知，並明知故問的。

「同時，容許我都暫時代表大部份男性講，當我地唔明白你哋口不對心時，究竟係諗緊咩，我哋係真係唔知道你哋諗緊咩。你試諗下，如果我哋真係知道你哋嘅想法，咁即係我哋同時亦知道，如果我哋嘅行為，唔符合你哋嘅期望，我哋係會死得好慘啦。其實我哋男人，係絕對冇誘因去以身試法，無可能明知會觸發一個氹足女伴3日3夜嘅危險，仍然堅持去詐唔知的。」

男友人D：「拿，我哋唔係你哋男朋友，真係冇需要呃你地。至於另一part『如果估唔到你哋諗咩，其實就冇意思，即係唔關心』。

問題主要係出於，男人天生，係唔習慣估人哋諗咩的。我哋想要咩、唔想要咩，會清楚地表達出來，亦唔會expect人哋要估下我哋心底裏面點諗，因為我哋覺得唔使估嘅世界，快捷方便，少好多麻煩。

至於面對你地女人『估唔到就係冇心』嘅呢個批評，容許我舉個例，例如我公司老闆都會講——『喂！嗰啲嘢你應該估到我想咁做啦，點解你唔自動自覺完成左佢呢？』

但好多時，唔係做嘢唔上心，而係老細唔講，係真係唔知道有個啲嘢要做。如果你都曾經遇過上司，用呢個理由，話你返工做嘢唔上心。

你應該明白，其實指令，有時，係真係唔會估到有D野係要做的。另外，你地更加要理解， 10樣老細冇講要點做嘅嘢，可能有9樣你已經盡量嘗試估，並且完成左。作為一個唔擅長估嘢嘅生物，估中9樣，都算係咁啦。但通常，老細都係睇唔到的，咁係咪好頹先？」

男友人A：「所以啱啱段嘢，應該改為－－

『很久很久以後我們才知道，

當一個男孩說他不明白你想甚麼

是真的不明白

非常非常不明白』。」

我：「大家留意返，呢段《小幸運》YouTube，係華語歌點擊率少有地破億嘅一首。所以呢，我想問3位女士，聽完佢地兩位男士一番偉論後，你會唔會覺得，男人估唔到你地心入面諗咩，其實係無罪嘅呢？」

3女：「唔覺囉！」

我：「好。我地可以埋單啦咁。」

text by Tyler Li (facebook: 泰兄）

（圖片來源：《小幸運》youtube截圖）