是日噏day：故弄玄虛溝女術
女性友人K，分享佢近來遇上左一位令佢好有「戀愛感」嘅男人。問佢嗰份戀愛感點樣黎，佢一開頭都話有啲難以解釋。最後講出咗一個原因：「我覺得佢好似好神秘咁，令我有一種細個時對男仔囉囉攣嘅感覺。」
再傾落去，佢分享咗一啲佢同呢個男人相處嘅內容。相識咗3個月，朋友K都仲係唔知佢實際幾多歲啦，屋企住邊區啦。唔係佢無問呢個男人，而係呢個男人講說話嘅時候，總係笑笑口，唔知佢邊個句講真邊句講笑。
問起佢幾多歲，一時叫佢估下，有陣時話自己28歲，有陣時又話自己35歲，再問落去，又話好啦開估啦，其實佢33歲，講到最尾卻又補多句：「其實我講笑，我屬虎，今年30歲架咋。」
問佢住邊頭，有陣時話自己住黃大仙，有時又話自己喺阿姨度住，住東涌，一個屈尾十陣間又返堅尼地城屋企落樓下同朋友飲酒。
至於職業，總算因為有common friend，知道佢係從事金融業，但問到工作內容，都係答埋啲廢話，話自己得閑就洗下廁所、煮下嘢食咁，冇咩特別野做。
面對着呢啲故弄玄虛、欲蓋彌彰嘅對話，因為個男人嘅幽默感，朋友K即使有時覺得有兩分煩厭，但係都仍然仲有八分受落。
呢種故弄玄虛嘅溝女方法，其實有唔少女仔都受落。以前曾經聽過一個所謂愛情心理學理論，就係如果一男一女一齊去做運動，體育所引起嘅心跳加速狀態，有可能令到雙方做完運動時見到對方，會因為生物上嘅心跳加速，混淆以為自己對對方產生戀愛感覺。
唔敢肯定呢個理論係咪真係有科學根據，但感覺混淆造成嘅戀愛感，卻都未必無道理。就好似呢種故弄玄虛溝女法，就係刻意喺對方心入面放低好多問號。入局嘅人，一嘗試思考呢一堆無答案嘅懸念，嗰份囉囉攣嘅不踏實感，好容易就會混淆，以為係因為呢個人，令到自己朝思暮想囉囉攣。
最後好奇心，可能真係可以殺得死貓。
呢類充滿好奇心嘅女性，通常都係少不更事嘅少女。年紀有返咁上下嘅女人，見得多男人，都知道呢種懶有嘢嘅presentation有幾無聊。所以事情最有趣嘅地方，係我呢位明明3字頭嘅朋友K，點解都仲會食指大動上檔呢？
可能因為佢嘅戀愛經驗，得一次咁大把。所以邊個話拍多幾次拖唔好架？起碼中少好多無聊tricks先啦！
text by Tyler Li (facebook: 泰兄）
（圖片來源：《盜海豪情》劇照）
