是日噏day：有一種乞人憎嘅撒嬌女叫郁手郁腳

「耶~~~!」「喂啊~~~！」然後一野拍落嚟你手臂。有晒聲有晒畫面，巴打一定知我講邊種女仔啦，係咪？

我想同呢類有郁手郁腳所謂「撒嬌」習慣嘅女仔講：「停啦！你知唔知自己好乞人憎好煩嘅呢？」

有一種女仔，唔知喺邊度學返嚟嘅，對住男性朋友，成日持熟賣熟郁手郁腳。如果受嗰位係你自己男朋友，ok fine，佢願捱，你當然可以願打。但係對住男性嘅普通朋友，呢類女，成日懶得意咁郁手郁腳，真係好煩。

呢類女仔打人嘅手法，一般有幾種，包括：一野拍落你手臂； 兜心口趙落嚟；搣手臂；而行為最為核突最MK嘅，更加會玩搣Lin頭（生物學學名，又稱為乳頭）。

首先一樣嘢，你年紀又唔係細，仲學咩人郁手郁腳呢？如果你話你今年未滿16歲（即係仍然會令男性衰十一嘅嗰個年紀），我都當你細路女唔同你計較。但係喂，都一把年紀啦，唔好再懶cute好冇？有時一下無情力打落嚟，你估唔痛架？你隻手又唔係幼。

呢類女仔另外一個乞人憎嘅位係，你好聲好氣同佢講：「喂！咪搞啦！痛啊！」佢會答類似：「男人老狗，肥施大隻，打幾下會死咩？有幾痛啊？」

喂姐姐！問題唔係在於會唔會死，係我唔鍾意啊！如果會唔會死先係重點，你俾我揸一下個胸夠唔會死夠唔痛啦，咁係咪可以隨便俾我揸兩嘢先？

又，當你重複要求佢咪再搞，而佢又以為自己好pure好true好「那些年」地繼續樂此不疲地同你「玩下咋嘛」，你細細力還一下拖咩？佢又突然玻璃人上身，同你講：「喂啊！你駛唔駛咁大力啊？我女仔嚟架！」

喺啲moment，你除咗想一邊講粗口一邊質佢個頭落屎坑之外，都應該無咩其他諗法。但當然，純屬幻想啫。女士自己唔behaveherself，唔代表男士要有失身份。

喺呢度，呼籲有呢種郁手郁腳習慣、失禮到暈嘅MK妹：如果你真係有一份無可救藥、不得不打人嘅慾望同需要，可以循正常途徑去發洩，例如學呢排最興嘅MMA丫，又健康又做到運動。係咪？

又，如果你去打MMA，應承我，記得call我，我熱烈地希望睇到你爆缸嘅一幕！OK？

text / Tyler Li