是日噏day：那些化身男友才會發生的問題

呢兩日好多人討論做兵嘅問題，我認同，如果明白自己嘅狀況， 安安份份做兵，其實係OK嘅。反過來要諗嘅一樣野係——如果有一日你從兵嘅位置，化身成娘娘嘅男朋友，究竟可以點算？

應該好多人會話：「喂大佬！唔使再做兵，真係溝到手，可以享用娘娘喎！做兵黎講，夢寐以求啦！咩叫做可以點算？」

要明白一樣野，做兵係一種距離，真係埋身做男朋友，係完全另一種距離同埋相處方式。有可能你同佢，保持「兵與娘」嘅距離，先最適合，一拉近左，自然會有另一種距離，一種完全習慣唔來，你未必識得，亦未必適合嘅距離。

唔好講其他嘢，其實淨係關於磨擦嘅機率，同埋expectation嘅變化，已經可以衍生出好多問題：

1、見家長

見家長黎講，你做開兵，你見佢家長，當然冇問題啦，但掉轉如果係佢見你家長，可以好大鑊。

以前「兵與娘」嘅關係， 最多佢都係「X你老母」多嘅啫，唔會真係見到你老母架嘛。試諗下，如果帶佢一齊去飲茶，佢由娘娘化身為你女朋友，你梗係有不一樣嘅expectation啦！就算唔expect佢對你老豆老母千依百順，起碼都希望佢有起碼嘅「識做」同禮貌啦。

如果，佢餐茶成程都唔同你老母傾計，淨係掛住玩電話，又或者直情串你老母，呢種只有男朋友嘅距離先會發生嘅事，你又忍唔忍到先？既然佢從前當慣你阿四，你估佢又會對你阿爸阿媽好得去邊呢？

2、其他軍事收益

既然你做慣兵，你未必會介意做咗佢條仔之後，繼續課金的奉獻。但以前做兵，你嘅奉獻係冇眼屎乾淨盲的。佢同你出街，用返你送嘅野，等你知道——「你送俾我嘅野，我真係有用架！」好正路。

但如果你做咗佢男友，佢都冇理由日日用死你送俾佢嗰一個袋姐。你將會見到佢用唔同嘅袋——但你根本心知肚明，其他所有袋，都係其他兵送嘅，感覺，又是不是味兒呢？

3、帽事嘅

娘娘收兵，一般都唔會淨係收你一位。到你做咗正印男友，其他士兵兄弟，你估又會唔會一夜間全數陣亡呢？

正所謂福利嘅嘢，無人嫌多，一條女既然做得出收兵嘅行為，點會為咗你放棄其他福利？就算俾你搵到證據佢食其他人茶禮，佢都會同某人收咗五千萬一樣，死口唔認，會同你講你太多心，事件「基本上係唔存在嘅」，喂！你吹得佢脹咩？

收受利益之外，更甚者係派發軍餉嘅同時，仲可能將你化身Luigi，綠到你面都青。正所謂：「帽事嘅！」你又可唔可以真係當冇事呢？

4、「你」去咗邊？

做兵嗰陣，你想見多啲，佢都未必有時間分派到俾你。但當你地成為情侶，見嘅時間，會幾何倍增。

以前見到佢嘅一個禮拜短短幾個鐘，你先做唔到自己啫，而家係一個星期可能有5日，你都可能要成為奴隸。問心嗰句，唔辛苦咩？辛苦過打工啦！

仲要你嘅存在感，未必真係咁強。你冇見過好多娘娘，影相嗰陣都好興有另外一個人幫佢揸機單頭照嘅咩？你分分鐘就係揸機個個「隱形人」，連合照證明「存在過」嘅機會，都未必有。

5、美夢成真的落差

最後呢一點，未必關女仔事，反而係呢位少年可能太年輕了。做兵嗰陣，要你落搭啦喎，忍者喬裝嘅功夫，當然唔會馬虎。

但當你成為左佢男朋友，你應該會見到佢落咗妝嘅樣，更可能見得幾多下。需要明白，女人化妝同唔化妝個樣，係可以差好～～～遠的。有啲人，直頭係眼耳口鼻，連埋條眼眉都可以一齊消失，變咗張A4紙咁樣。

如果你一路係FF開佢化晒妝嗰個樣，你可能會好想對佢唱：「不要低頭，妝容會掉下來，你是女神……」

所以你以為，做咗娘娘嘅男朋友，會係最高嘅享受咩？佢分分鐘同其他人出街先化妝，就係同你一齊就唔再化妝，你吹咩？更加唔好講，佢會係你面前拔胳肋底毛啊、擠暗瘡啊、放臭屁啊等等，令人夢想幻滅嘅事情啦。

text by Tyler Li (facebook: 泰兄）

（圖片來源：scott webb）