是日噏day：香港核心醒目價值

睽違多年，據聞Ekids即將重組開個唱， 網民討論氣氛熱烈，大家都好有興趣知道，究竟演唱會會有幾多人睇。

咁多年來，對於有樂壇小強之稱嘅Tommy一直浮載浮沉、半紅不黑，其實我係戥佢唔抵的。因為Tommy(ekids)嘅存在，根本係體現「香港仔」特質、獅子山精神嘅最佳範例。

「香港仔」嘅特質係點呢？

就係正經野唔去踏實鑽研，一味諗住點樣走精面、搞噱頭嘢，用最少嘅精神、時間、同埋成本，去得到最大嘅利益。

君不見成個香港一街都係呢類推崇醒目行頭嘅香港仔？Tommy仔(ekids)出道至今咁多年來，始終如一，作為一個跳舞唱歌嘅男子組合，咁多年來跳舞、唱歌、甚或至造型，實力上都冇見過落過D咩工夫改進，但係間唔時就會出嚟搞吓噱頭野，永不放棄，繼續堅持。

如果香港一大群醒目仔，今次唔出來支持下自己嘅老祖宗，實在係大逆不道，講唔過去。

所以，2017年1月21日Ekids喺旺角麥花臣嘅演唱會，大家真係要支持（拿！我真係有幫手sale 架！）如果大家自問唔係「香港仔」，亦都可以搵出身邊仲有一個喺左近嘅呢類人，提醒佢哋買飛，潮撐祖師爺。

要分辨出誰是「香港仔」，一般可以參考以下（或更多）嘅特徵：

1、識得邊個邊個

「香港仔」做嘢，唔使靠實力嘅，最緊要識得人多。

當然唔係講緊人脈唔重要，但純粹靠人脈，唔好好發展自己嘅才能，再加上四周圍將啲其實唔係好熟嘅人，講到自己親生兄弟一樣，就係正宗「香港仔」嘅生存之道！

2、多範數但永遠唔知佢做過咩

同呢類人傾計，總係咩都關佢事。

你同佢講起啲咩，佢都話佢有接觸過有搞過，無所不知無所不曉咁款。但係如果你識得佢一段時間，你會發現你從來都冇見過佢有咩實質做過出嚟。至於平時吹嘅野，究竟係咪真有其事，可能要留返俾劉德華去研究，先至佢係咪「繼續吹.jpg」了。

3、好鍾意幫人買嘢

當然，呢樣梗係唔係講緊佢出錢幫你買野啦，邊有咁好死。係講緊呢類人好鍾意話自己識邊個邊個，可以買到例如限量版乜乜乜、可以撲到XXX嘅演唱會飛、可以托邊度邊度嘅朋友係外國帶乜乜乜返黎。只不過，好多時最後都係無咗件事，而當少數情況佢真係完成到任務，除咗顯示到佢自己人面有幾廣之外，亦都係買咗個人情俾你（當然中間有濕腳亦唔奇），

又或者方便佢同其他人講——「我同阿邊個邊個好熟架，上次XXX既然唱會飛第一行，都係我幫佢買咋嘛。」然後，你可能亦成為佢「人面廣」印象嘅組成材料。

4、撈得好掂但係經常唔夠錢周轉

一味靠吹嘅人，最緊要俾人覺得佢撈得掂。但係世間上最能夠靠吹吹出嚟嘅嘢，就係錢。所以每當呢類人遇着要俾錢，甚至乎自己冇錢啦、俾人追還錢啦等等嘅情況時，就會用「呢排未周轉到」去做開場白。

「呢排未周轉到，遲啲還錢俾你好冇先？」「喂借住啲錢嚟先呀！我過兩個星期有單大野搞掂左就有錢返架啦，到時周轉到即還！」但偏偏，呢類「撈得好掂」嘅朋友，係最經常咁鬼有錢，但係就周轉唔到嘅生物。

5、向唔熟嗰範嘅人扮專家

其實「香港仔」平日都有吸收唔少資訊，所以每當遇上熟某範野嘅人，佢地會負責聽。再搵一範你唔熟嘅同你吹，搖身一變化為專家。

當你聽完一大輪天花亂墜極具娛樂性嘅故仔之後，可能你會有食完風嘅感覺，但都唔緊要啦，最緊要係一旦「香港仔」如果提出「喂！夾下野嗰！」嗰陣，你會打醒十二分精神，咁應該是無問題的！

講咗咁多，最後最後都係要宣傳下！

記住！2017年1月21日，旺角麥花臣嘅Ekids演唱會約定你，見證「香港仔」奇蹟！OK？

至於Ekids會否唔鍾意我咁樣話佢地？你都傻嘅，最緊要有綽頭有noise嘛，起碼我都因為咁出咗篇野提咗大家兩次要捧場啦，係咪？

text by 泰兄 (facebook: 泰兄）

（圖片來源：網絡圖片）