有數計：戴健康手帶 愈戴愈肥

近年好多人都會戴上健康手帶，呢啲智能手帶號稱可以紀錄運動情況，例如行咗幾多步，食咗幾多卡路里咁，就算連你坐得耐都會主動提示你起身行下，尤其對於有目標想減肥人士，更加好似一個助手咁幫你。不過最近一項研究指出，配戴呢類手帶唔單止唔會容易減肥，甚至令體重回升！

呢一項為期兩年嘅調查，搵嚟500位18至35歲過肥嘅人士，平均體重為95公斤，頭6個月佢哋透過專家指導運動及飲食，平均每位減肥8公斤。及後18個月，分開兩組，一組戴上健康智能手帶，另一組則唔用，兩組人自行進行減肥。實驗完後，兩組人都有體重回升，不過有手帶嘅減咗3.6公斤；無戴嘅反而減咗6公斤。

研究嘅學者話，原來戴住手帶，反而會不斷提醒使用者去活動同做劇烈運動，以追趕定下嘅運動目標，但之後反而更肚餓而進食更多食物。所以結論係，除非你肯定自己食嘅嘢少過運動量，或者自制能力極強保持健康飲食，如果唔係都係戴唔過喇。