《有種心痛是，前度變成陌生人》

戀愛結束，最難受嘅唔係情人變朋友，而係過一段時間之後偶遇到當初最親密嘅前度，然後發現大家已經變成連朋友都不如嘅陌生人。即使你早已經放下前度，重新開始新嘅生活，但係遇到前度嗰種熟悉又陌生嘅感覺都係令人久久不能釋懷。

有啲人可以同到前度做朋友，但我諗大部分人都唔可以。即使邊個負咗邊個都好，事過境遷之後，喺街上忽然見到對方，但大家都無再打招呼，形同陌路人，然後自己會諗起曾經大家係最親密嘅人，究竟有咩深仇大恨，搞到今日連一句問好都開不了口。又有啲人同前度被迫繼續相處，於是返工返學總會撞到面，但係大家都會當對方透明，心裡總會覺得尷尷尬尬。

而呢種望見前度變陌生人嘅難受，其實真係同仲愛唔愛無關。正如你有一個曾經如膠似漆嘅好朋友，有日反目變成仇人，再遇上都總會感到一種無奈，然後忍唔住諗，其實係咪真係嚴重到連朋友都唔可以做？尤其喺你放低咗之後，更加覺得其實無咩不共戴天之仇，只係大家都回不去了，只係大家都被生活推著走，只係現實太殘無情啫。