港男回帶睇 4位過氣港男現況如何？

事隔四年，《香港先生選舉》終於返嚟啦，小編最記得就係當年伍詠薇帶埋個「氧氣罩」扮暈，同埋佢哋一show肌，搞到一眾花旦無哂儀態，最緊要喺班香港先生怕怕醜醜咁好得意。今年港男仲有唔少喺「親屬」，好似有王浩信弟弟同羅天宇細路，好令人期待呀！

咁多屆港男之中，袁偉豪應該係最成功一個，近年已經穩做男二，下套新劇仲做男一添。之但係又幾多個港男可以好似佢咁好彩，唔少香港先生得獎後只係做二打六角色，以下就係4個上極都上唔到位嘅香港先生：

高鈞賢：返大陸搵人仔

作為《第一屆香港先生選舉》總冠軍，高鈞賢理應受到力棒，應該會好快上位架？高鈞賢有樣有身材，初時TVB都有畀佢拍戲分唔少嘅劇集，可以喺《幕後大老爺》做男二。但係佢演技麻麻，又無咩特別角色畀佢發揮。於是就越做越霉，淪落到成日要扮色魔，《寒山潛龍》入面仲要非禮阿婆。所以最後高鈞賢9年約滿就離巢，而家就搞緊餐廳，同埋返大陸拍劇搵人仔，佢拍嘅《山海經之赤影傳說》仲係捧紅唔少港星嘅湖南衛視上播映。

黃長發：Model公司經理

黃長發參選時，因為係其兄黃長興亦曾參選香港先生而受到注目，終於喺《第二屆香港先生選舉》奪得總冠軍。佢係法籍混血兒，加上外型討好，唔少人都睇好佢嘅發展。不過因為廣東話麻麻，入TVB而嚟只係做得好少嘅二打六角色。09年仲爆出跟同鞋王三奶李姿霆（Karen）玩姊弟戀，拍拖半年火速玩完，仲互數對方，之後就離開咗娛樂圈。而家喺模特兒公司做經理，兼且同拍拖四年嘅外籍model女友求婚成功。

鄭健樂（Rocky）：私人健身教練

《第一屆香港先生選舉》健力組冠軍，憑住42吋巨胸和18吋手瓜呢副非常健碩嘅身材，令觀眾留下深刻印象。Rocky雖然十分大隻，但偏偏做戲又木木獨獨，傻傻更更嘅強烈落差，反而令觀眾覺得佢幾得意，甚有觀眾緣。所以入行十年拍過唔少劇，可惜始終演技未夠班，成日都係做搞笑大隻佬二打六角色，近年主要做私人健身教練，偶爾都會返TVB拍劇。

陳志健：業餘拳手

陳志健係《第二屆香港先生選舉》健力組冠軍，一開頭都只係做啲小角色，但後來曾經憑《仁心解碼》做有自閉症嘅子浩同《拳王》嘅阿力被觀眾讚賞其演技。但可惜未能食住個勢，TVB之後都係畀啲小角色佢做，所以主要都係做唔少TVB小生花旦嘅私人健身教練，而且仲不時參加西洋拳、泰拳公開賽，做業餘拳手。而佢最為人熟悉嘅係做咗甘草演員羅樂林嘅女婿。

圖片來源：鄭健樂健身網站、高鈞賢微博、黃長興微博、tvb.com