獸性大發：貓貓智商排行榜 邊種貓最聰明？

早前同大家公佈過狗狗品種智商排名，好多養貓嘅貓奴都曾相追問有無貓貓版喎。原來目前並無一個正式嘅權威機構向貓貓進行智商測試，不過都有少部分動物學專家憑個人見解及多年經驗作出一個比較客觀及公認嘅排名。以下Top 10聰明貓貓品種，睇下你家主子有無份啦。

第十位：波斯貓

最古老貓品種之一，形象通常為雪白而高貴，現代嘅波斯貓已經被人類培養成扁面、大眼、大耳，形象走可愛路線。

第九位：孟買貓

全身黑色，由於似印度黑豹，故名孟買貓；肌肉發達，頭腦靈活，有自控能力而且性格溫柔，非常好嘅家貓。

第八位：美國短毛貓

唔使多介紹，目前最多人養嘅品種之一，體格強壯，天生聰明靈活，善解人意，加上肥肥嘅身軀，難怪咁受人類歡迎。

第七位：蘇格蘭摺耳貓

性格溫馴，唔單止喜歡同人一齊，更加喜歡同其他貓貓，甚至狗狗一齊都可以，非常少有嘅性格，可惜天生多病痛，唔建議養。

第六位：美國反耳貓

熱愛和平，動作靈敏，而且唔怕人，鍾意與人類為伴，不過反耳貓並非人工繁殖，係非常罕有嘅純種貓，據講全球不超過一千隻。

第五位：夏特爾貓

比較少聽，英文為Chartreux，一身灰藍色，有一對金黃色大眼，聽明可愛而且感情豐富，雖然有極高警戒心，但都唔會攻擊人。

第四位：暹羅貓

貓界中嘅貴族，最早期東方短毛貓種之一，性格極為機警，而且能夠揣摩人類感情及心意，可以輕易得到人類歡心。

第三位：峇里貓

為暹羅貓新親，擁有暹羅貓有嘅性格特質之餘，仲有非常優美嘅體型，亦因為其動作多變生動，好似峇里島上居住嘅舞者一樣，故有此名。

第二位：亞洲豹貓

擁有豹一樣嘅斑紋，體型大外表狂野，但其實生性善良，對人類好有依賴感，而且好鍾意撒嬌，仲有極高忠誠度。

第一位：斯芬克斯貓

又稱為無毛貓，好似《魔戒》中嘅「咕嚕」一樣，無毛貓係由於基因突變而生成，雖然外表唔可愛，但極度聰明，體格強健，集所有貓優點於一身。