【玩樂】聖誕連假放4日 工廈活動大玩特玩

今年聖誕夾埋星期六、日，正好有一個4日連假，話長唔長話短唔短，要出國旅行又唔算多時間，而且又貴，不知簡簡單單留港消費好過！不過聖誕節最好當然同埋一大班朋友一齊聚一聚，單單食餐飯交換禮物又嫌無新意的話，不如搵啲刺激活動一齊玩下啦！今次介紹幾個戶內活動，雖然唔使日曬雨淋，不過一樣要好大活動量，保證大家玩得痛快！

室內激光槍大戰
好多人都怕打War Game，尤其係女仔，咁又係嘅，BB彈始終都會痛，陣間傷到面仔就更加唔好啦！銅鑼灣Laser Mads就幫大家解決呢個苦惱，因為佢哋提供激光槍對戰，完全唔痛唔癢！目前有4種玩法，分別係單人各自為戰、兩隊對戰、特工模式以及喪屍模式等。詳細玩法唔細講，總之透過激光槍去攻擊對手，就算被射中「死」一次，相隔十多秒就可以自動重生，唔怕一早輸就無得玩！收費方面，非會員的話每局$118，包場的話公眾假期價錢每小時$4,388，最多可以30人一齊參加！

Laser Mads
網站：http://www.lasermads.com/

機舖任玩包場
一大班朋友仔當然最適合一齊打機！不過無理由去機舖玩咁街童，又阻碇，朋友屋企又容納唔到咁多人，位於觀塘就有一間以打機為主題嘅Party Room喇！CAVE就有幾十款遊戲，全部不另收費，包括有賽車櫈提供嘅賽車Game，揸槍玩嘅射擊遊戲，跳舞機，籃球機等等，最特別係老闆特登入咗幾部十數年前嘅古老街機，仲真係玩番當年嘅遊戲！另外亦有日本嚟啲老虎機、波子機！而場內除咗遊戲機，都有卓球機及飛標等等。收費方面6點前每小時$40，6點後則為$50。

CAVE
網站：http://www.cave.today/

葵芳玩飢餓遊戲
喺《Hunger Game》入面Jennifer Lawrence用一把弓箭玩足幾集，係咪睇到大家非常熱血，好想試下呢？咪以為要玩射箭一定要去戶外先得，其實位葵芳一間工廈一樣得。呢到有齊全副裝備，非常安全，課程有分高中低，就算完全未玩過嘅朋友一樣可以上初學者班。至於本身玩過嘅朋友，教練都會教導大家，並且可以以奧運方式玩計分制！不過射箭有一定危險性，12歲以下小朋友就唔玩得喇。每節1.5小時，收費$180。

致勝射箭
網站：https://www.facebook.com/winning.archery/

彈彈跳10米高彈床
外國人就經常會喺後花園放彈床玩，不過香港就無地方啦！好在原來北角都有室內彈床樂園Ryze！佔地18,000呎，內設多個區域，有不同難度不同玩法，例如彈床籃球區，可以畀大家以彈床嚟個飛身入樽！另外嘅彈床海綿海，點跌都唔怕痛！當然唔少得自由活動區等大家隨意玩花式呢。不過講到一大班朋友，最啱玩當然係閃避球區啦，兩隊互相攻擊，非常過癮！收費方面，10人Party為$2,700，15人為$3,600，每小時計。

Ryze
網站：http://www.ryzehongkong.com/