瑞典研究：雞味驅蚊大法！

Yahoo有數計

夏日炎炎最怕蚊，有時噴極蚊怕水都冇用真係幾灰，不過瑞典研究指出，原來雞味可以防蚊，只要蚊一聞到活雞嘅味就會即刻閃走，睇嚟潮流將會興起新嘅防蚊方法！

瑞典農業大學教授伊格涅爾聯同衣索匹亞學者一齊研究，發現如果屋企入面有一籠活雞嘅家庭，通常都唔會有蚊。咁係因為原來雞會食蚊，而對蚊而言，雞血冇營養，所以自動避開。學者仲話，只要室內有雞嘅氣味，就可以有效驅趕蚊子。

不過，如果要喺屋企入面養活雞就真係冇乜可能，所以學者已經研究出令蚊好驚嘅化學物質，打算日後造成防蚊劑。學者話現時市面上嘅傳統蚊怕水只可以趕走飛近人體嘅蚊，但雞味蚊怕水就可以將成間屋入面嘅蚊嘅數量減少95%，成效顯著。而研究人員已經派過呢啲特別提煉出嚟嘅雞味蚊怕水畀村落嘅村民試用，發現雞味蚊怕水嘅驅蚊效果比養活雞中好，而呢種味道主要嚟自雞嘅羽毛。