純粹港嘢：最影響感情的一種態度叫「老奉」

兩個人相處耐左，除左會日久生情，亦有機會日久生厭。其中一個好影響感情既壞習慣叫「老奉」。唔止愛情，其實係親情、友情或者工作，大家可能都試過面對呢個情況：你本來好願意付出，最後因為對方既態度太過老奉而嬲豬。

最討厭的「老奉」對象叫上司

正所謂你的上司如何，你的日子也必如何。人生最怕遇到老奉型上司，佢地覺得工作係生命既全部，就老奉地認為下屬都要咁。要求你準時開工，但永遠唔會容許你準時收工，有得準時食lunch已經係大恩大德。你OT想補時或者補錢，佢會話你太計較，做細既就係應該無條件OT學經驗先岩。自從呢個世界有左網絡，呢類上司就忘記有種基本人權叫收工。無論幾夜，只要佢諗到有野叫你做，就即時whatsapp你，並老奉地認為你就算個人離開左office，個腦都要繼續為公司服務。

希望有機會睇到呢篇文既你，無論係做緊人上司，定將來會有機會做人上司，都切忌做一個老奉既老細。當公司為左慳錢而請一個人做兩個人既野，你下屬肯額外OT做多D，真係額外付出黎架！無收錢架！另外，係放左工或者放緊假期間，尊重下人類既私人時間，唔好老奉地whatsapp公事比對方好嗎？

最無奈的「老奉」對象係情人

一對戀人相處耐左，好容易習慣左對方既付出，將對方為你做既所有事情視為理所當然。朋友嫌男朋友悶，話佢已經好耐無買小禮物，無制造小驚喜比佢。但佢忘記左呢個男仔，會幫佢執屋、整電腦、拎D衫去洗、係佢唔得閒時陪佢媽咪去睇醫生。現實中既愛情唔會下下都好似韓劇咁，對方未必識得做浪漫野，但係日常生活對你的照顧同體貼其實都係一種付出。識得欣賞，識得令對方感受到你懂得佢既努力，對另一半黎講，係一件好暖心既事。

唔好因為老奉，將對方既愛同付出視之為應份。永遠記住，呢個世界無一個人，有義務無喇喇對自己好，每個人的愛同付出都有底線的。老土地講句，失去先黎後悔就唔抵。

人生最易「老奉」既對象係老母/老豆

如果你已經過左25歲，請唔好再老奉地要父母照顧你。當父母越黎越老，其實心態真係會變返好似小朋友咁，偶爾想有人照顧返佢地。尤其如果你仲同緊父母住，請學習成為一個好室友。屋企人煮完飯，請幫手洗碗，有人幫你洗完衫，起碼自己收返D衫，屋企既紙巾、洗頭水、洗潔精等等用完，請幫手買，唔好下下等阿媽補給。無論你係出於自願定無奈同家人一齊生活，都要學識分擔家庭責任，唔好老奉地認為家務就應該家長做哂。

養大你係責任，但你大左，家長既照顧同付出就唔再係應份。如果朋友對你好，你識得對返人好，咁同樣地，當屋企人對你好時，都要學識錫返佢地，有來有往的愛才恆久。

純粹思考題：你最討厭身邊既家人 / 情人 / 朋友 / 同事 邊樣老奉到喊的行為？