英國調查：拍拖至少一個月才敢素顏見伴侶

正所謂「女為悅己者容」，對著心儀嘅對象扮靚啲都好正常，但你又估唔估到好多女仔即使識咗對方好耐，都依然怕以「真面目」示人？英國一項調查話你知真有其事！

調查訪問咗2,000名單身女性，發現佢地約會新男友前，會花至少40分鐘由頭到腳悉心打扮，希望以最佳狀態示人。有60%嘅女性表示喺約會期間會經常補妝，唔希望自己有丁點瑕疵。超過30%受訪者更加承認第一次去男友屋企過夜，會趁男友未瞓醒，靜靜雞走去廁所補妝，確保對方起身第一眼見到自己最靚嘅一面！

研究更加發現，女性平均喺拍拖一個月後，先願意畀伴侶一睹自己素顏真面目。近50%女性擔心唔化妝會遭對方嫌棄，而超過30%女性就擔心太早以素顏示人，會令關係止步。而有拍緊拖嘅受訪者更覺得，如果當初相識時冇化妝，根本就唔會一齊，睇嚟女性對於自己素顏的確欠缺信心。

其實，英國一間健美公司都曾經做過一項類似嘅調查，喺年齡介乎18至30歲嘅女性組別當中，有54%嘅受訪者表示唔願意喺拍拖後嘅頭一年，畀對方見到自己冇化妝嘅樣。但奇怪嘅係，51%嘅受訪者反而接受拍拖後半年，畀對方睇到自己嘅裸體，反映相比起身材，年輕女性對於自己樣貌嘅信心差少少啊。

雖然化妝的確可以令人醒神啲，但素顏嘅你先係最pure最true，所以又使乜怕呢。