茶水間：你上司同你同事拍拖 如何自處而不失霸氣？

辦公室可唔可以拍拖呢？呢條問題真係千古難題，不過好多人都會贊成呢個答案「可以，不過請你低調」；無錯嘅，好多時同另一位同事拍拖，其實唔係咩大不了事情，只要公私分明，其實大家都唔會故意去刁難；但係，最麻煩嘅事係，老闆同下屬拍拖，而且你只係同Team嘅同事仔一名，面對Team入面直屬老闆同你Teammate拍拖時，你應該如何自處？

首先，作為一個見義勇為（好似係）嘅同事，你應該查明拍拖嘅同事究竟係咪因為老闆嘅壓力而不情不願之下同老闆一齊先，萬一佢係因為想保住份工先因壓力同老闆一齊，其實你應該出聲，同該位同事傾下可以點做，或者搵更高級上層反映。

其次，如果佢哋雙方係真心相戀，你就要考慮自身前途喇！畢竟老闆同你同事拍拖，永遠唔係私人問題，一定會牽涉到公事上，簡單如你喺公司做過咩，都可能會被同事轉告老闆知；更莫講過升遷加薪呢啲大事。所以你好可能要搵定後路，一係轉Team，一係轉工。

最後，如果你真係接受唔到，又覺得要自己離開好無理嘅話，不妨直接向老闆表示自己嘅不滿或者覺得唔舒服；不過可能會出現兩個極端，一個係老闆接受你意見，可能將你同事調走；但另一個可能就係唔妥你，再慢慢迫走你！