葡萄友：拜年隨時出醜 留意呢4個老尷位

今日大年初一，祝大家新年快樂！農曆新年可以話係好多人又愛又恨嘅節日， 愛嘅當然係有一筆橫財，恨嘅當然就係要面對着一班可能一年先見得個一兩次嘅親戚，一時問你讀書讀成點，一時問你拍拖未，一時問下你搵到嘢做未， 一時問吓你幾時結婚，尤其是唔熟嗰啲，有時真係分唔到究竟佢係關心你呀定係搵嘢嚟講。不過如果你係跟你嘅男／女朋友去屋企拜年，又唔同講法喇喎，隨時可能發生一啲更加尷尬嘅事呀。

1. 唔識叫人
唔識叫人唔係真係話你係啞，而係你嘅記性太差，記來記去都記唔到啲親戚邊個打邊個，有時甚至叫錯添。不過最尷尬嘅位就係如果你唔開口叫人好似冇禮貌，但係如果開口叫錯又好樣衰，呢個時候唯有問吓你隔離嗰個叫佢多啲提水啦。

2. 份禮唔夠厚？
話到明去佢屋企拜年，梗係要買番份賀禮，呢個時候另一個難題又出現啦，就係到底買咩好呢。如果一個唔覺意，買份禮比同輩（表弟表妹之類）細份又或者失禮，畀人地感覺你小家。所以事前最好問清楚你嘅男／女朋友通常啲親戚會送啲咩，以免失禮啦。

3. 催結婚
如果你唔係第一次上去對方到拜年 ， 已經開始同對方嘅親戚混熟，相信呢個情況一定會發生係你身上，有可能係對方嘅親戚真係好想你哋結婚，或者冇嘢講搵啲嘢嚟講，除咗尷尬之外咪笑一笑囉，雖然少不免真係會好想回應一句，「又關你事！？」

4. 覺得呃利是
呢個情況係比較少見嘅，始終新年都係喜慶日子吖嘛。上到對方屋企拜年，就記得一定要有禮貌逢人都打招呼，買定份靚靚仔仔嘅賀禮，畀個好嘅印象人哋，祈唔好掛住玩電話，如果上到去淨係坐喺度咩都唔做，又好難怪人哋覺得你係想嚟呃利是嘅。

相片來源：IQRemix@flickr