葡萄友：香港母子戀悲劇收場 美國母子戀卻異常普及？

近日一單新聞，已婚49歲便利店女經理，與26歲男店員發生「母子戀」，甚至懷上身孕，及後因為男子另有新歡，甚至唔理女方懷孕，任其自行食藥墮胎。最後女方憤怒之下用漒水潑向男子令其毀容，最後女子被判監禁6年零8個月。女子更加離婚收場；男子亦未必能完全恢復容顏，一段忘年戀，以如此悲劇告終。其實姊弟戀近年就見怪不怪，不過去到呢種女比男大廿年以上嘅母子戀，接受程度就真係大減喇。不過外國著名心理學博士兼兩性關係專家Tina B. Tessina就曾對呢類母子戀做過深入研究，更訪問過多單個案。發現40至69歲嘅女士當中，有3分1都曾經同過細自己10年以上嘅男士拍拖！Tina仲話母子戀有偏向愈多嘅趨勢，當中原因包括以下：

男人愛熟女

真係㗎！男士去到40歲之後，有一部分雖然仍然愛年輕少女，但另一部分就偏向上咗年紀嘅女士，愛佢哋成熟嘅智慧及豐富人生經歷，一齊拍拖更有細水長流感覺，唔需要刻意製造驚喜浪漫，

科技發達

受惠於現時護膚化妝品及科技發達，醫學昌明之下女士上咗年紀仍然可以保持美麗，仲有大量健身中心，予女士運動機會大增，可以令女士外型上比實際上年輕更多！

不要求男士條件

一般男女，女士當然希望男士有經濟能力，事業亦有一定嘅發展，唔使養埋老婆但起碼唔需要人擔心；但母子戀就無呢種要求，只係普通純愛情角度出發就可以。

離婚率大增

近十年離婚率急升，而且唔少都係上咗年紀至離婚，以至離婚之後有一大班女士重投入市場，母子戀機會大大增加。