葡萄友：香港美食車開業 老闆：目標一個月搵40萬

11架美食車終於正式開始，一向鍾意去夜市、食街嘅香港人嚟講，只可以話係「止癮」嘅作用，因為實際上大家希望嘅都係有一個固定嘅夜市，大家可以「掃街」食小食！不過推出幾日以嚟，美食街吸引嘅果然一如所料，並唔係香港人；而一眾大陸金主。無他嘅，美食車價錢絕不平民，一個包$20，美式叉燒包更賣到成$38一個。其中一輛美食車嘅老闆就揚言，一日可以賣到300個，一個月營利已經有30至40萬。果然係離地價格配飲食集團，大家以為平民美食嘅話，似乎就諗得太多喇！貫徹我哋政府一直嘅政策，就係「遊客優先」，食唔起嘅本地人？Who Cares？美食夜市，點解一直得唔到政府推行呢？原因推斷有以下幾個，睇睇啦。

斷大集團米路

夜市的話通常價錢會較貼地親民，萬一真係有固定一個夜市，無擬對目前香港幾大飲食集團造成極大影響，你知啦，咩人都可以得罪，有錢人、大集團唔可以得罪嘛，所以有個平民夜市咪即係斷大飲食集團米路？點會丫。

衛生問題

撇開背後嘅鬼主意，其實一大關心問題係衛生問題，需知道一個大範圍嘅街檔食市，勢必好大油煙，而且食物一旦唔管理好，非常容易滋生細菌，的確政府係比較難去監管衛生潔淨，所以係待解決嘅問題之一。

難搵地方

要做夜市，地點必須非常方便而且地方廣闊，但香港市區地已經少之又少，又唔會肯用上普通嘅行人街道因為會阻塞路面，要喺市區搵一大片空地，談何容易？有都拎晒去起樓賺大錢啦係嘛？

圖片來源：thedeadrepublic@tumblr