葡萄友：已婚男辦公室偷食 純因工作得不到滿足？

辦公室除咗係工作嘅地方，其實好多時都係談情嘅機會呢！好多人都話返工唔好帶個人感情，但其實可以咁做嘅人有幾多，更多時候甚至喺公司同同事拍拖。拍拖都尚好；不過亦有機會喺辦公室發生婚外情嘅行為呀！辦公室婚外情，今日我哋唔討論男女誰對誰錯啦，不過想講嘅係，究竟點解會咁做？根據最近英國倫敦薩里大學一項最近調查，訪問咗200位年齡介乎28至62歲曾經試過喺辦公室同同事出軌嘅男女，並得出相關原因，男同女竟然大大唔同呢。

男人出軌：未能於工作上搵到滿足感

研究顯示，辦公室覓食嘅已婚男，未必係因為自己伴侣唔好、夫妻生活有問題等，而絕大多數原因係工作太沉悶，或者未能畀到滿足感佢哋，而令呢班男士四圍向女同事調情！負責調查嘅教授話，因為工作上未能得到應有嘅成功感，因此先向女同事落手，借此滿足自己嘅自尊，增加返工嘅趣味。

女士出軌：多種原因

至於女士辦公室出軌嘅原因就林林種種，而且唔同男士，絕非因為對工作嘅苦悶或者唔滿足先出軌；其中例如「覺得對方了解自己」、「比老公更事業有成」等嘅原因之外，其中有一點發現頗為有趣，就係超過6成受訪女性喜歡男老闆多於女老闆，更認為有機會的話唔會抗拒同男老闆調情。教授得出嘅結論係「女性覺得工作上最大嘅競爭對手，就係其他女性。」