葡萄友：轉新工最怕面對陌生環境？3點你要知

3月都過咗一半，Bonus要放要拎都七七八八，相信好多人已經密密搵工跳槽啦係咪？俗語有云「魚唔過塘唔肥」，好多人都抱住呢個心態，每每幾年就轉一次工；同樣地，身邊總有好多朋友或者同事，一份工打足10年8年唔肯走，你問佢咩，唔係人工特別高，只係唔想離開Comfort Zone；要轉工，就要適應新環境，任憑你點叻，去到一個新環境新作風，總會唔慣。尤其辦公室就係社會嘅縮影，如果一個新同事去到新公司，驚慌、唔自然、不安、焦慮等或多或少都有。要如何由一個新同事融入新公司？點樣可以令同事接納你？不如睇下外國著名事業顧問Rachel Kim敎你，從微小處著手啦。

了解人事架構

去到新公司就好似第一日返大學咁，一個朋友都無，唔知點算，Rachel建議主動開口同其他同事傾計，不過切忌問個人問題呀，先從公司關係入手，例如問人喺咩Team，負責做咩，及佢哋上司係邊個。呢啲問題唔單止可以同人破冰，仲可以了解公司人事架構。

靜心觀察

叫你主動同人傾計，並唔代表要你無時無刻大大聲講嘢，大部分時間請你靜心觀察，留意一下同Team入面嘅組員關係、Team與Team之間嘅關係，了解邊個最有機會接納你提出嘅意見。就算意見提議被拒絕，都算一個學習嘅過程，聆聽批評亦係一個成長過程。

從第一個朋友開始

了解咗公司文化之後，自必然就開始要融入環境，Rachel建議第一步，就係要挑選一位易親近又志趣相投嘅同事，同佢發展做朋友，因為好多公司嘅人際關係，都係從一位同事開始，然後佢會邀請你同埋佢公司中嘅朋友一齊聚會，慢慢就可以結識到公司入面第一班朋友喇。