【購物】聖誕購物症候群

今年聖誕節比往年特別熱鬧，繁華鬧市燈光普照，係真心購物，定係鍾意流連櫥窗Window shopping，其實係咪咁易睇得出？ 一樣米樣百樣人，你又屬於邊一種？

禮物先生
「你快樂所以我快樂」，聖誕購物目的只有一個：買禮物！ 平時去旅行買一袋二袋手信嗰啲呢，到咗聖誕節就開始計劃下假期會見到咩朋友，去咩party，然後出一張清單，由相識幾十年嘅朋友，到party裡面會見到朋友嘅小朋友，揀禮物，完全係佢哋嘅樂趣。

買物Mall王
精通毒物情報，興趣甚廣，平時成日喺facebook share買呢樣買嗰樣，有時候諗住買少少嘢想佢幫下眼，最後買到一頸血，同呢啲朋友出街，少啲定力都唔得。

獨行俠
呢類人同朋友行街好鍾意睇嘢但係好少見佢買嘢，以為佢哋夠定力？ NoNoNo，只係因為佢哋優柔寡斷又太花心，費事要朋友陪企喺舖頭諗一大輪又揸唔定主意，話住唔買走人，其實心裡面放入待購清單，幾日後自己單拖走去買。
(聖誕節係搶貨季節，錯過咗，就係錯過咗啊)

民主Fashionista
有無發現總有啲人鍾意喺facebook貼自己喺fitting room嘅相，佢哋嘅手機點解有咁多試身相？ 好簡單，對佢哋嚟講，買衫係著俾人睇嘅，所以朋友嘅意見對佢哋好重要，佢哋嘅what’s app有個group就係同閨密交換買衫心得嘅「公投平台」。

鍵盤購物狂
平時唔多出街，最唔鍾意喺條街上面拎住一袋二袋俾人話敗家，咪以為佢哋足不出戶就係慳家之人，其實佢哋一樣買到通屋都係嘢，精通各家網購衫褲鞋襪大中細碼誤差，平時有乜心頭好都放哂入wishlist，一到聖誕節出bonus就即刻㩒掣出貨。

圖片來源：
flickr: https://www.flickr.com/photos/44412176@N05/4165334479