【購物】聖誕商場裝飾巡禮（下篇）
睇完上篇介紹香港幾大商場嘅聖誕主題，大家係咪都已經開始逐個去影相去集郵呢？（未睇嘅朋，可按這裡）其實未算呀，嚟緊同大家介紹以下幾個大場嘅聖誕裝飾，風格比較傳統啲，如果覺得上篇太多卡通、太小朋友嘅話，呢幾個商場就要去喇！
Christmas Together＠海港城
貴為全香港第一個有聖誕佈置嘅商場，每年海港城嘅聖誕燈飾都唔會令人失望！今年仲請咗聖誕老人故鄉芬蘭嘅插畫Rami Niemi合作，以「Santa is Everywhere」為主題，繪畫出一大班現代聖誕老人！Rami用佢一貫粗黑線條同用色大膽嘅畫風，以幽默風趣嘅故事場境，將聖誕老人大「Update」，例如著起西裝、著短褲、甚至揸火箭等等。至於戶外方面，今年就有「小雪翁」聖誕派對，用大批得意可愛嘅小雪人作為佈置，而且每個造型大小都唔一樣，連表情都有分別，不妨揀啱一個自己最喜歡嘅小雪翁，同佢不停Selfie啦！
Where Christmas is Made＠太古廣場
聖誕每個商場都充滿視覺上嘅美感，不過今年金鐘太古廣場就非常厲害，直情要令你嘅五官都感受到聖誕喎。今年主題名為Where Christmas is Made，商場分為多個區域，分別可以用視覺、嗅覺、味覺、聽覺同觸覺去體驗聖誕，例如安放唔同喇叭喺多棵聖誕樹之中，搵嚟比利時朱古力大師Frederic Blondeel開設Pop-Up朱古力店。而最最最特別，就係可以自己DIY用人手砌一個屬於自己嘅小型聖誕擺設，玻璃樽入面擺放迷你人仔同聖誕樹，只要預先網上預約時間就可以喇！今次呢個五感過聖誕，夠晒特別啦！
聖誕樹湖之鏡＠黃埔新天地
天空之鏡大家可能喺相入面見得多，不過下下要飛到十幾鐘頭機程外嘅地方都咪話唔驚。其實如果近近地，今年可以坐地鐵去黃埔，欣賞黃埔新天地嘅聖誕佈置：聖誕樹湖之鏡。黃埔新天地呢隻黃埔船，四面都有水池圍繞，今年主題為「Sparkling Xmas」，水池上放有多棵小型聖誕樹，以相機拍攝的話就可以影到湖倒影，形成天空之鏡嘅效果呢。至於船身入面，就係一個6米高「仙鏡萬花筒」，由多層擁有多個切割面嘅水晶石包圍，拍攝起嚟變化多端，色彩豐富，啱晒喜歡Blink Blink嘅朋友啦。
聖誕雪樂園＠時代廣場
聖誕節好多人會外遊，日本、韓國就最受歡迎，好多時主要原因好簡單，就係有雪玩！香港雖然唔會落雪，不過今年銅鑼灣時代廣場就以「雪」為主題，製造出一個「聖誕雪樂園」！最大焦點當然係一個室內嘅雪場，由法國團隊以製雪機���造出一個雪國效果，綿綿白雪，大人細路都可以隨意喺雪上滾動，甚至掟雪球、滑雪、砌雪人，唱「Let it go let it go~」 ！商場仲特別安排咗雪鞋，不過提醒大家雪場溫度係零度以下，記住要著夠衫呀！
星光長河＠新城市廣場
講起聖誕燈飾，又點會少得沙田新城廣場吖！受惠於面積特大嘅戶外空中花園，每年都大玩星光花園主題，今年仲特別首次加入「璃光星河」，長達300呎嘅流動河水，大家仲可以將願望同祝福寫喺星願球上，再放入河中，隨水流動，極級浪漫！另外仲設璃光水滴攝影工作坊，可以即時報名參加，有攝影大師教你如何影出星河最浪漫嘅一瞬間，唔怕黑媽媽影唔到靚相畀女朋友／老婆投訴，夠晒貼心啦！
