【購物】送乜畀衰佬？情人節男士禮物推介
情人節對於男士嚟講，可以話非常苦惱，通常都係男方安排活動、食飯、禮物，如果唔想令你個佬覺得有付出無收鑊，一份送畀個佬嘅禮物一定唔少得。男士唔同女士，大家要留意，男士最緊要係實際，反而「心思」只係其次。所以好多時女仔鍾意嘅嘢，未必適用於男士呀。所以話送禮物畀男士係需要抽離自己女仔嘅心態，再諗返轉頭。呢種近乎「Danish Girl」一樣嘅䧳雄轉換心態，真係好難。明白嘅，不如我哋幫大家諗埋，以下幾樣禮物，實無衰！
領呔
每位成功男士都有一位賢妻，而每位賢妻都應該為丈夫挑選一條領呔。大家知道嘛？原來男士與男士之間，第一眼睇嘅係對方嘅樣，第二眼已經係留意領呔。咁點揀一條合適領呔呢？基本上斜紋同碎花都係不敗之地，而布料必須係以緞面為主，加上絲質細滑，厚厚的不能太薄。顏色方面，切忌太Sharp色，以低調色Tone為佳。
皮帶
同領呔一樣，皮帶都係男士必備物品，重點係唔需要太大條太浮誇，只需要留意重點嘅細節位就可以，不能以女生角度出發哦。另外用料方面，有人話一定要揀選用牛皮，其實的確用真皮會比較柔軟及耐用，但如果你個佬好易出大汗的話就咪喇，因為汗味好易滲入皮帶，變成汗臭；所以唔一定要真皮，只要有光澤就可以。
PS4 Pro
講完衣物類，男士又點會少得打機吖，無論幾多歲嘅男士，打機都係必定嘅。目前最熱一定係PS4 Pro，可以支援4K畫質，簡直就係機壇大哥大、霸主，得PS4得天下！早排一推出即時斷貨，水貨炒到成5千蚊，最近Sony先啱啱有一批大貨到港，可以安心買行貨。買遊戲機會唔會令個佬唔理你？教你，買多個手掣，同個佬一齊玩，又係另一番情趣哦！
航拍機／GoPro
你可能會話：「個佬成日話無謂，唔要。」係嘅，但係你又偏偏見到佢每次經過電器舖都會駐足觀賞，無錯喇，呢種「想要但又好似唔值得買」嘅嘢，就係最好嘅禮物選擇之一啦！信我，衰佬收到之後，一定笑到合唔埋口，然後講句「哎呀，都話唔好買啦。」其實個心開心到不得了。更何況呢兩樣嘢其實最後都係同你一齊用啦。
Headphone
聽音樂係非常好嘅Relax方法，男士為工作每日咁有壓力，有一個隔音力強嘅Headphone真係可以脫離現實一陣（即係脫離埋妳呀），雖然身理上未必可以有一個個人空間，但心靈上都有一個自己嘅小天地嘛。當然，你話一個女人仔點識買？上網睇下評論啦，價錢豐儉由人，有時平價貨一樣有好貨色。
