【車仔麵時間】旺角 3 間新店比拼！
旺角一向是車仔麵戰圈，大街小街橫街總有一兩間俾你隨時衝入去醫肚。最近又新開 3 間，一於睇睇有咩抵食？
【立即讚好】全新 Yahoo Food Facebook 專頁
總店在太子的<十六座車仔麵>最近在旺角開了分店，唔只一味 sell 懷舊，而在傳統車仔麵中加入新意，於坊間口碑不錯。(a)
開放式廚房，設計成街邊車仔檔。(a)
紅菜頭麵，蘿蔔，紅腸，雞翼尖，鹵水豆腐 $48。撈麵汁好正！用了台灣醬油膏，爆香了的薑蒜等提味，甜而香；鹵水也是自家製，豆腐切細件，非常入味；豬紅也比坊間的不同，爽而較腍身，微微黏口，幾特別。(a)
撈麵可配咖喱魷魚(單點$30)，老闆大廚陳先生說常有客人投訴「魷魚太細份」，原來這是因為魷魚(用阿根廷乾魷魚)連咖喱汁一齊煮，愈煮愈入味，魷魚卻會愈煮愈缩，所以件頭雖小，咖喱卻十分香濃。 (a)
「紅菜頭麵」於坊間絕不多見，要找人訂製，入口有點像蝦子麵，不過因為撈麵汁太搶，不太吃到紅菜頭味。(a)
牛舌芯，米糖鹵雞翼，流心蛋，菠菜麵，魚蛋，金沙青，蝴蝶腩 $76。小店招牌 3 寶是「牛爽，金沙青，蝴蝶腩」。蝴蝶腩即是橫膈膜，可想而知每隻豬只得一小片，有筋有肉，薄薄地，好入味；牛爽即是牛舌芯，取牛舌中間最滑的部份。蛋都用北海道蛋，雞翼加了麥芽糖煮，整隻都更甜，正！(a)
「金沙青」即金沙骨的最表層，平時連骨吃，很少單吃。咬下去以為自己在吃牛，其實是豬，不過就比牛腩腍少少。(a)
鹵水鮮雞腸 $30。喜歡的雞腸的一定不會失望，新鮮，洗得乾淨，條條都爽身。(a)
冬菇，鹵水八爪魚，咖喱麵筋，豬大腸，鹵水雞腎 $51。(a)
魷魚不只有咖喱的，也有用台灣白鹵水鹵過的，爽身，不過就不及咖喱惹味。(a)
花菇細細粒，好甜好好味！(a)
於車仔麵店而言設計有心思，遠看才知是架車！(b)
典型小店格局，不算闊落，不過勝在大玻璃窗有足夠日光。(b)
十全大美富貴麵 $88。絕對可能是全城最大 size 的車仔麵！麵碗直徑足有 11 吋長！雞中翼、牛孖筋、魷魚、豬大腸、陳皮魚蛋、豬軟骨、蘿蔔、鮑汁冬菇、魚片頭、牛坑腩。皇牌食材哂冷，建議最少 2 人 share。(b)
冬菇用花菇，細細粒，以鮑汁炆得腍身，入哂味，咬開多汁，黏口又好甜；蘿蔔精選過，無渣又清甜；大腸洗得乾淨，和魷魚一樣爽爽地，有嚼口；不過要注意由於太大碗，有部份材料可能會浸得太耐變腍，如果自問食慢，建議叫多隻碗，另外放餸。(b)
蘿蔔、冬菇、牛筋、油麵 $40。店主本身從事家禽生意，有門路拿到靚貨，所以車仔麵湯底都是雞骨 + 豬骨熬成，非常夠味，湯頭卻唔油膩，也不渾濁。(b)
生菜手打魚肉湯 $25。不用來貨，用鯪魚肉，每朝自己打至爽彈，因此數量不多，賣完就無。細細粒，帶魚甜。(b)
炸鯪魚球 $30。手打魚肉的香炸版，更添惹味。(b)
最多甜品小食舖的煙廠街最近開了間車仔麵小店，老闆入廚逾 30 年，最擅長潮州菜，滷水菜式等，手勢有保證。©
豬皮，魷魚，大腸，韭菜，南乳豬手油麵 $54。麻辣汁自製，麻香十足，有辣勁卻唔係辣到麻痺那種；阿根廷魷魚單是汆水都接近 1 星期，爽彈好吃；豬手膠質重，黏口；豬皮爽脆，整體好吃！©
大腸不用雪藏貨，用新鮮大腸，自己汆水洗淨，特別有油香。©
金針菇，豬紅，辣魚蛋，翼尖，大腸$44。雞翼尖入味，魚蛋是陳皮魚蛋，彈牙，加辣汁食唔停口。©
豬紅夠爽！©
大腸有油香又乾淨，不羶。©
初一十五麵 $34。專門為素食者而設，有金針、生菜、雲耳、豆卜、蘿蔔、冬菇，配的清湯底少少甜，很受附近 OL 歡迎。©
麻辣豬耳、麻辣豬肚、咖喱/酸齋 各$10。酸齋十級好食！用了花椒/八角/山楂等調成調味；豬耳都好香口。©
INFO
a/ 十六座車仔麵
地址：旺角通菜街 103 號地舖 (2341 6759)
b/旺囍車仔麵
地址：旺角豉油街 11-15 號萬利商業大廈地舖 (3583 4233)
c/ 甄甄車仔麵
地址：旺角煙廠街 31 號地下
