阿七精神 劉浩龍
劉浩龍自己也沒有想過，一首〈髒話阿七〉竟然可以讓他成為網民讚賞熱話，更把他從大螢幕帶番上舞台，下月中首次舉行兩場真正屬於自己的音樂會。 〈髒話阿七〉歌詞內容，講述受著巨大生活壓力和命途坎坷的阿七頂硬上的故事，多多少少也可說是劉浩龍入行這十五年來的一個小小反映： 九七年成為新秀冠軍後，便遇著華星唱片倒閉，簽約無綫做主持拍劇集，結果因為硬啃了一隻「死貓」離開，轉了做網站MJ，轉行做賣表；○四年簽到正東，拿到了新人獎，可惜一直紅歌不紅人；再然後，他轉移當電影裏的綠葉和配角，令他眼界大開，對做人做事和娛樂圈的遊戲規則，彷彿統統開了竅，也終於有自己的目標了。 「我家會以智叔（廖啟智）做目標，唔通你會話智叔撈唔掂咩？我好清楚自己家嘅崗位，我今年生日之後先三十六歲，但四十歲先係男演員發展電影嘅開始，即係我仲有四年幾時間去磨練。」 縱使現在他仍然會遇著很多不愉快的事，但他已學會了「阿七精神」，講句粗口發洩後，又繼續頂硬上。畢竟，他曾經歷過十多年的挫折；畢竟，他入行是被人問候娘親開始的。 娘親 劉浩龍沒法忘記九七年的六月一日。 那一夜，他成為了新秀歌唱比賽的大贏家，一個人獲得了「金」獎、「最佳演繹」獎和「最具演藝潛質」獎，正當他捧?三個獎座讓記者拍照時，兩位估計是其他參賽者家屬的男子，走到他耳邊說：「喂，恭喜晒喎！X你老母啦！」 「嗰陣我當堂呆咗！嗰晚後來我媽咪搭城巴走，喺城巴度佢聽到更多粗口：『X你啦！造馬嘅！仆街！』我媽咪第一次承受到呢啲嘢，我feel到佢有幾難過！」 「三料」新秀冠軍，新鮮出爐沒多久，卻是被無綫安排當《Sunday新地帶》主持，一星期返一日工，月薪一千大元！「當時都要問阿媽攞，冇計！」 死貓 再沒多久，出碟安排十劃都未有一撇時，華星唱片便倒閉，劉浩龍換來了TVB演員合約一份。「月薪三千七百幾，唔記得係五百蚊定七百蚊一個騷錢，好似好巴閉咁！」他苦笑地說。 由幾乎見唔到樣、冇對白開始，一直拍到鄭伊健做主角的《雙面人》，終於有個公司職員「阿偉」的角色，對白雖然離不開跟伊健說聲「早晨」，或報告一下「阿邊個頭先返過嚟」，但總算比同劇其他新人多。 誰料有天，他卻無端端被召去「照肺」。「management話我畀導演lock咗，因為之前一日我冇拎劇本喎！但嗰日我都冇對白。後來find out係認錯人，不過management就同我講：『冇0左啦！lock咗就冇得拆，你食咗佢啦！』我嗰陣年少氣盛，咁我就好啦！拜拜！」 夜蒲 離開TVB後，幸得葛民輝搞的科網收留，當網站MJ，八千元月薪，可惜隨著科網泡沫爆破，他失業了，要轉行做賣表維生。 「呢份工，我都試過畀人當口當面講：『咦？你咪劉浩龍？做乜搞成咁呀？』但最好笑係，嗰幾年我冇工作目標，又冇唱片出，完全唔覺得自己真係入咗行，但有時夜晚去蒲去玩，都會成日畀傳媒影到我，然後就寫我鍾意夜蒲，有乜夜店鬧事，都會無啦啦入埋我數，大造文章！結果啲人睇到報道後，都對我印象好差。我當時做緊賣表，根本見唔到記者，冇得澄清，惟有又硬食。」 現實 不甘一個新秀冠軍就這樣賣表下去，結果他把八千元的儲蓄，全部拿去錄音室錄了三首歌的demo，向全港唱片公司毛遂自薦。○四年，他終於得到了正東的唱片合約，更獲得了多個新人獎項。 「娛樂圈真係現實到飛起！我攞咗新人獎落到台，有啲人走埋嚟恭喜我，有啲仲同我講：『一早都話你得0架啦！』講呢啲類似說話嘅人，正正就係之前約我上去公司見面，同我講：『你唔得0架啦，捱咗咁耐，你轉行啦！』嗰啲人！點解啲人可以咁老土嘅？然後我更加明白，呢個圈嘅遊戲規則係點！亦都好清楚邊啲人先至真係我嘅朋友！」 電影 出了唱片，當了真正的歌手，無奈因為之前的負面報道影響，幾年來紅歌不紅人，立下決心轉戰到大螢幕去，認真地拍起電影來。 「導演麥兆輝拍《竊聽風雲2》時同我講：『我嗰陣拍《大搜查之女》，真係唔鍾意你，因為成日見你淨係識掛住吹水，但你今日真係唔同晒！』拍完佢仲話：『以後，你就係我哋嘅班底啦！』嗰吓我真係滿心感激！」 劉浩龍說，電影令他整個人完全開竅，特別是一○年拍莊文強的《飛砂風中轉》時。「導演要我扮梁朝偉，我當時真係睇咗好多好多次《無間道》。有場戲，我同子聰拍之前一晚，兩條友喺停車場度練咗三粒鐘，第二日一拍，導演好滿意，嗰刻我就明白到，原來我真係鍾意拍戲，我真係要再認真啲去學、去做！我後來喺一個電影訪問時話，電影改變咗我整個人，點知個記者0係後記度寫：『車，我就唔信電影可以改變一個人嘞！』嘩！你話呢啲人係咪short0架？」 八卦 由始至今都是一個人單拖到片場開工的他，開始留意其他演員在片場裏的動靜。「你睇青雲、智叔佢哋，開工時都係一條友，唔使埋位時，都係靜靜哋坐喺度培養吓情緒。我遇親啲crew都對我好好，因為我冇助手檔，好多時佢哋都好主動走嚟教我嘢！」終於，但凡杜琪峰、麥兆輝、莊文強、爾冬陞等大導演的戲，都會看到他的嘜頭，總算叫做穩定下來了，但他的母親卻沒有因此以他來晒命。 「我媽咪同妹妹呢方面做得好好，有啲唔熟嘅人問親佢哋同我有冇關係，佢哋都會話唔識我！我個妹仲呃咗佢個好朋友十年！哈哈！不過有啲識我媽咪嘅，都會經常問佢：我家做緊乜、係咪同邊個拍拖、徐濠縈同陳奕迅係點……我媽咪最怕呢啲！邊有人會咁八0架？」 撻咗 至於唱歌，他則以另一個模式去享受。「出唱片，家根本賺唔到錢，我覺得點都要做個負責任嘅歌手囉！唔好再話畀大家聽，啲碟賣咗幾多，掂過碌蔗啦！實質數字大家知啦！家我會keep住間中就發表一首歌，呢種合作模式，唱片公司一定唔會蝕，仲分分鐘有賺喎！」 早前，他於黃偉文的作品展唱出新歌〈髒話阿七〉，片段上載於YouTube後，至今已有十多萬的點擊率。「其實嗰次出場前幾日，我喺第二個活動上第一次唱，太耐冇上台，我緊張到唱唱吓有幾句歌詞唔記得晒！我即刻垂低頭遮醜，好彩啲人以為我感觸，喊到甩嘴。不過嗰晚返到屋企，我就嬲自己嬲到喊，不斷問自己問題，又打去同啲朋友講，點知陳奕迅話：『車，撻咗咪撻咗囉！我成日都撻著啦！』呢啲咪朋友囉！無論你係好嘅時候、唔好嘅時候，佢哋都會喺你身邊、聽你講嘢！我有一班呢啲由零開始認識嘅朋友，真係一個lucky guy嚟！起碼我家可以小你咪小你囉，理得你係咪陳奕迅呀！哈哈哈！」 盛男煩惱 這是我第一次跟劉浩龍見面，對他較深刻的印象，我都是從電影上看到的，但現實中的他呢？ 我從他過往的專訪中得悉，他無論聲線和舉止，都跟陳奕迅很相似，然而訪問這天，我卻感覺到他並非一個自信十足的人。例如拍照時，當我讚他那件牛仔褸很好看時，他卻說：「我以前一直都唔敢著短褸0架，因為我身形唔夠『科』！」訪問時，他又會說：「好變態0架！我成日都覺得，出到街冇人會認得我！」 另外，我本來以為他不愁寂寞，身邊會有很多女性主動埋身。「吓？入行咁多年嚟，我邊度有緋聞呀？講嚟講去，都係得何C（何韻詩）同鄭小姐（鄭融）。我家真係冇女朋友！我又唔出街，朋友圈子咁多年嚟都係嗰啲，仲愈嚟愈窄，你話我點會搵到？其實我識好多三十幾歲嘅男仔、女仔，都同我一樣咁嘅處境；我都好想搵番個，仲要係結婚嗰種，但真係冇！」 好彩的是，這位盛男現在生活得很充實，不用跟那些乜乜導師物物導師學溝女、學扮靚、學同人講嘢要保持四十五度角、眼神只能接觸對方兩秒，兼跟別人SMS時不能做最後回答的那一方，字數要少……。 劉浩龍下月中舉行的音樂會，名字很簡單，就是「小音樂會」。 九七年六月一日，他拿著這三個新秀獎拍照的同時，其實也被別人問候娘親。 二月在阿Y黃偉文作品展上，發表新歌〈髒話阿七〉，他落力地唱，贏了網民讚賞。 一○年的《飛砂風中轉》，劉浩龍（右一）用心地演出，令他真正愛上電影。 入行多年來，劉浩龍（左一）一直得到了圈中一班好友支持，不離不棄。 開始懂得認真拍戲後，漸漸成為了很多大導演的御用配角，例如杜琪峰（左三）。 跟鄭融的緋聞傳了多年，兩人一直沒有承認。 撰文: 覃慧 攝影: 何國豪 化妝:kei kei 髮型: Jay Yeung@Hair Corner 服裝提供: BLACKBARRETT@I.T 手表提供: Philip Stein 場地提供:紅磡都會海逸酒店 設計: 陳佩珍
