食神教路：茶餐廳最肥菜式Top 5 乾炒牛河竟然無份？！

茶餐廳係好多港男港女嘅至愛，快靚正（已經唔係「平」），而且食物即叫即炒，熱辣辣夠開胃；不過大家都知愈好味，就一定愈唔健康愈肥仔啦。眾所周知乾炒牛河係肥嘢，但其實呢個概念並非完全正確，比乾炒牛河肥嘅碟頭菜，比比皆是，今日就介紹以下比牛河更邪惡嘅菜色！

乾炒牛河 （卡路里每碟888）

第五位 菜遠牛腩飯 （1160）

牛腩本身暗藏大量脂肪，已經唔簡單，而菜遠牛腩飯一定會用上大量汁，想健康少少建議大家走汁！

第四位 雪菜肉絲炒米 （1200）

雪菜肉絲感覺上就好健康，但其實米粉一炒的過，就超級唔健康，因為米粉本身好乾身，如果唔用大量油炒係唔掂。

第三位 生炒雞絲飯 （1250）

好多人誤以為炒飯無汁，無汁即係唔肥；大錯特錯！炒飯用極多油，而且雞絲通常連皮一齊炒，更加邪惡！

第二位 焗豬扒飯 （1400）

焗飯本身用上大量芝士，加上炸過嘅豬扒一齊焗，一碟已經等如一個成年男人一日總熱量嘅一半。

第一位 豬扒炒公仔麵 （1700）

遠遠拋離其他碟頭飯，比乾炒牛河更加肥近一倍！全因為即食麵本身已經係油炸，再炒嚟食，加埋大量肥肉嘅豬扒本身亦係炸過，根本係油浸出嚟！