4個原因請珍惜Plan行程的旅伴

一大班人去旅行最大嘅學問係，邊個Plan行程，由買機票、住邊、食乜、搭乜、去邊到通通都要計同plan，呢份工作堅係花上好多精力時間同心機。所以，如果你身邊有呢種願意自動波收集大家意願，再plan行程的旅伴，咁就真係恭喜你，並麻煩你尊重佢嘅決定，無論對與否佢都係一個超級抵得諗嘅好朋友，plan一個行程堅係唔容易，以下4個原因，睇完你就明。

1. 遷就旅伴口味

作為planner，唔可以齋滿足自己私慾，因為人人口味唔同，plan行程就要顧慮所有人的感受，滿足所有人，有時plan行程個個仲要放棄自己想去的地方，成全大局，所以搞手真係好難做嫁。

2. 唔係打開旅遊書咁簡單

咪以為plan行程，是但係Yahoo到打目的地，又或打開本旅遊書就得，有時真係要睇好多前人分享，睇下伏味濃唔濃，而家仲要睇埋時間、地點，經過龐大處理分析，真係唔係人人都做到！

3. 奉獻勁多私人時間

除咗諗行程，仲要搵資料，酒店、景點、路線、去過的人的評價，總之淨係睇到有排，未計自己仲要返工，又可能要專登行去書局買本旅遊書返屋企煲，一個行程分分鐘花上了幾日時間。

4. 承受走數危機

講錢傷感情，往往有人就真係好唔識做，點都唔會主動比返錢負責book酒店機票的人，有時候甚至出咗聲都收唔返，就真係貼錢買難受！

相片來源：teenageweirdo15 @tumblr