人民影后 鮑起靜
眼前的鮑姐鮑起靜很愛笑，說話語氣溫文爾雅、大方有禮，衣着簡潔清新，跟她在《殭屍》中那個深藏不露、性格沉鬱，標準屋邨師奶打扮的「梅姨」落差很大。 在剛過去的金像獎中，她憑此角色獲提名「最佳女主角」，奈何最終落敗給章子怡，不少人也戥她唔抵，所以「最佳女配角」惠英紅在慶功宴上，公開稱她是自己心目中的影后；鄭大班的「D100」facebook fan page當晚post的「撐鮑姐，你是我心中的影后」，也獲萬多個網民like爆；連劉天賜亦在上星期撰文，大讚她在戲中演出「無懈可擊」，演技達「國際水準」！ 畢竟鮑姐從影至今六十載（由她五歲客串國語片計起），一直默默耕耘，多年來都是我們從螢幕上看到的慈母。「大家都咁關注我，我梗係好開心啦！我諗，呢啲都係香港人嘅情意結囉。」 贏不了獎座沒要緊，賺得了民心才是王道。 一個是親和力極強的「香港人慈母」，一個是蜚聲全球、甚有氣勢的國際巨星，你buy邊個？ 金像獎後，鄭大班的D100 facebook fan page這個post，獲萬多網民like。 《殭屍》中的「梅姨」黑暗沉鬱，鮑姐發揮得淋漓盡致。 撰文☆周彩霞 攝影☆陳縱宇 場地提供☆kubrick cafe+ 設計☆陳佩珍 子怡冇得輸 雖然在《殭屍》的演出人人讚好，在金像獎頒獎禮前，也被視為熱門影后，但最終「最佳女主角」獎座，還是落在《一代宗師》的章子怡手裏，鮑姐一早已打定了輸數，所以即使落敗，也沒有感到失望。 章子怡真係好值得攞獎，冇得輸！人哋喺第二度已經攞咗八個（「最佳女主角」或「最佳女演員」）獎，呢度（金像獎）點會唔畀個獎佢呢？係咪？ 至於我呢，其實到呢個年紀（六十五歲）仲有得第二次提名，呢個機會已經好難得、好難得，真係好光榮㗎！有咁多咁好嘅演員，連提名嘅機會都冇，咁我仲有得提名，仲想點呢？所以我有得參與，我就一直都好enjoy成個過程，嗰晚《殭屍》攞到兩個獎，我喺台下都已經喊到癲、開心到癲！ 輸咗？唔緊要啦，我絕對冇失望，亦冇唔開心，個個影展都總有四個係陪跑㗎嘛，而且嗰晚慶功宴，小紅（惠英紅）話我係佢心目中嘅影后，夠啦！感動晒啦！難得有《殭屍》呢個團隊，大家感情咁好、友誼咁好，我真係覺得好開心，始終呢啲機會，對我哋啲咁老嘅演員嚟講，真係唔多！ 雖然拍電視後，已轉型做「阿媽」角色，但八十年代的她，日常打扮依然入時。 十九歲時跟父親鮑方叔合演《屈原》，成為了兩父女唯一一次合作。 年輕時的鮑姐，甫入行便當女主角，更經常是娛樂雜誌的封面女郎。 頒獎禮後的《殭屍》慶功，鮑姐和惠英紅整晚攬頭攬頸，她說要多謝導演麥浚龍（右二），讓她有這樣一個感情深厚的合作團隊。 那一次合作 論到開竅，鮑姐說，那已是訓練班後的事。她十七歲畢業於香島中學後，便考入長城藝員訓練班，先在紗廠上班三個月體驗生活，才慢慢安排演員工作。 我未曾訓練班畢業，已經開始拍戲，就已經係女主角，的而且確，我嘅機會係比其他人多，不過並唔關我爸爸事。 其實點解我嗰陣要入長城呢？因為我爸爸嗰陣喺鳳凰，如果大家都喺同一個地方，會有好多顧慮。但因為咁，跟住我先諗番起，原來我成世人，淨係喺十九歲嗰陣，先同過爸爸合作過一部戲叫《屈原》，當時佢做老師，我做佢學生「嬋娟」，都幾多對手戲，而且呢套戲好犀利，係文化大革命之後第一部香港入內地嘅國語片，當時真係瘋魔全國，到o依家我返大陸，啲人都仲記得我做過《屈原》、演過「嬋娟」，你諗吓，我o依家都已經幾十歲喇，哈哈！ 不過真係好得意，嗰次之後，因為後尾長城解散咗，七九年徐小明、李兆熊就搵咗我入去麗的拍《大地恩情》，我嗰陣三十歲，當時已經叫做老，咁我就開始轉型做阿媽。而我爸爸嗰陣已經入咗去無綫，大家一直都唔同公司、唔同機構，就係咁，我同佢永遠都冇再試過一齊演戲。 五歲定八十 鮑姐生於演藝世家，父親鮑方是著名影星，母親劉甦是六十年代知名話劇演員。家中三姊弟，姐姐鮑起嘉從事銀行工作，弟弟鮑德熹則憑《臥虎藏龍》奪得奧斯卡「最佳攝影」獎。受父母影響，她從小便熱愛演戲。 我哋細個睇住佢哋（父母）做戲長大，一定會有影響。 嗰陣放暑假，我哋都有去片場玩，做吓茄喱啡。我五歲第一次拍戲，嗰套國語片叫《太太傳奇》，講黎小田同蕭芳芳係有錢仔、有錢女，開生日party，電影界啲小朋友都嚟晒（當客串），冇錢㗎，不過佢哋就每個小朋友都送件衫，我仲記得，我嗰日仲有我人生第一條紗裙仔，開心到不得了！哈哈！ 跟住呢，我又試過同王愛明反串扮男仔，梳咗個古裝頭拍《同命鴛鴦》，嗰場戲講夏夢同傅奇結婚，我同王愛明就攞住支蠟燭行喺佢哋前面，哈哈哈！拍咗一晚呀，幾好玩呀！ 到我九歲、十歲嗰陣呢，我仲試過做埋話劇，係大導演朱石麟先生嘅《大馬戲團》，講個細路女畀個戲團女班主虐待，一出場就要喊，但我完全唔識喊，啲演技好渣、好渣！好彩同我一齊做戲嗰位阿姨，每次出場都真係攞條鞭打落嚟，堅打到我喊咋！哈哈哈！ 由嗰次開始呢，我就發現原來我真係一啲演戲天份都冇。 七九年得徐小明等人找她加入麗的，與潘志文合拍《大地恩情》。 ○九年六十歲的她，憑《天水圍的日與夜》與張家輝齊齊在金像獎頒禮中稱王封后。 從來未紅過 七九年加入亞視後，鮑姐一做便三十二年，忠心不二，多年來她邊拍劇邊當節目主持，不時又會客串電影。對香港很多婦女來說，她是螢幕上的老友記；而對更多其他界別的觀眾來說，她則是「鮑方個女」。直至○九年她六十歲時，終於憑《天水圍的日與夜》，多了個「影后」的銜頭。 幾十年嚟，啲人都係叫我「鮑方個女」，我一啲都冇介意過，因為爸爸嘅光芒，真係光芒過我好多嘛。其實之後仲有「Peter個家姐」、「鮑德熹嘅嘅家姐」㗎！咁佢哋真係紅呀嘛，我呢，就一世都未紅過，哈哈哈！ 好多人都問過我，點解要留喺亞視咁多年，唔試吓過去ＴＶＢ。其實咁多年嚟，ＴＶＢ嗰邊都有搵過我幾次，但我個人好隨遇而安，唔鍾意搏命，唔鍾意爭取啲乜№機會，去到嘅話，我會唔開心。 我做演員嘅宗旨係，無論乜№戲，我都要盡力演好佢，只要大家見到鮑起靜嘅時候，都會覺得我唔錯，咁就已經好滿足！所以六十歲我先做到「影后」，先攞金像獎，絕對唔係太遲，對我嚟講，反而係一個好圓滿嘅句號！ 有次我個女同我講電話，佢話：「媽咪，好多人年輕時做過主角之後，都唔會肯做阿媽、阿嬸，或者三、四線，但你唔係，你一路係咁堅持，你嘅韌力真係好勁呀！」嘩！你知唔知我聽完之後，真係覺得好驕傲㗎！哈哈哈！ 我活到o依家六十五歲，可以成世都做我自己熱愛嘅工作，我已經覺得好好㗎啦！不過我冇諗過退休，因為我爸爸都冇退休，總之o依家有啱嘅戲、劇本咪做囉，冇咪做少啲，享受吓生活囉，年紀畢竟係大，都唔好太辛苦喇！哈哈！ 在亞視的日子，鮑姐最開心的一件事，是鄭則士當年曾點名要鮑姐演「貓媽」，才肯開拍《肥貓正傳》。 父親鮑方（中）○六年離世前，有幸見證兒子鮑德熹（左）奪得奧斯卡「最佳攝影」獎。 師奶仔生活 因為七九年拍電影《白髮魔女傳》，鮑姐與認識了多時的男主角方平擦出了愛火花，其後更於八一年共諧連理。那時長得帥氣的方平，是出名的萬人迷，身邊不乏女性埋身。 「我哋結婚嗰陣，好多人都好擔心我！因為佢太靚仔、太驕傲，係『被寵壞了的男孩』，係天之驕子，個個都對佢好，佢咪會覺得你一定要對佢好囉！」 正因為有個這樣的老公，本來可以做少奶奶的她，婚後卻做了個師奶仔，照顧女兒之餘，還要貼身服侍丈夫。 「初初結咗婚，我都幾辛苦㗎，因為佢以前好大男人！我哋以前有請工人，如果禮拜日，佢都一定要我整呢樣整嗰樣畀佢食，一定要我服侍佢，不過，算啦，婚姻總會有個人係要付出多啲嘅，咁我咪辛苦啲囉。反而o依家老咗，佢對我就好好多，星期日都唔想我咁辛苦，會出去食，不過斟水呀、食橙都要我搣埋畀佢呀，到o依家都係咁，幾十年大家都慣咗咯，算啦！哈哈哈！總之佢o依家對我好，我已經好感恩㗎啦！哈哈哈！」 1八一年下嫁方平後，翌年便誕下女兒方之樺。 2女兒十六歲時負笈英國。「我同爹哋送完個女到學校，佢爹哋就喺火車度喊，驚個女畀人蝦！哈哈！」 3去年女兒出閣，方平（左一）在台上哭着致辭，「唉，佢（方平）係咁㗎！成日都喊，好好笑㗎！哈哈！」
