B612: 聖誕總是要一鋪清袋

「今日啲同事問，點解我聖誕仲未同公司攞假呀。」今年聖誕係公眾假期long weekend喎，攞假？

「唔係呀，佢係話去旅行攞假呀！你知唔知呀，全公司得我一個聖誕會留喺香港咋。」我唔敢同Mandy講，其實唔去旅行留喺香港過聖誕係唔犯法架喎，至少警察唔會平安夜喺Times Square放催淚彈先。

但原來，催淚彈係唔會死人嘅，閃光彈就會喇。

Mandy一路同我呻，話佢班同事唔係同男朋友去韓國就係日本，仲係咁氹我話幾千蚊機票連酒店都唔係好貴姐。係呀，真係唔算貴架，如果今年復活節同佢生日唔係已經去咗新加坡同峇里島嘅就係囉。

如果要我揀，洗一萬幾千定係事後被Mandy哦足一頭半載，我諗答案好明顯。騎虎難下，我唯有死死哋氣 —— book機票。

「去台灣好唔好呀？有平機票喎，千八咋。」Mandy好似聞到垃圾車陣味咁一臉厭惡：「舊年十月咪去咗囉，唔好啦。」

泰國幾年無去喎？「聖誕流流去泰國咁熱，咩聖誕氣氛都無晒啦。」

要聖誕氣氛，咁一係韓國日本喇？「嘩咁遲先買，成四千幾好唔抵喎。」

要平，柬埔寨無得輸啦啩？「柬埔寨得個吳哥窟，我又唔鍾意睇呢啲嘢嘅，有咩好去啫。」

對我嚟講，其實聖誕節只係想同自己鍾意嘅人過，就算食KFC��樣咁開心。過節又唔係要過俾人哋睇，點解一定要同其他人比呢？

不過以我御女無數嘅經驗，我好清楚而家只有一條出路：

「咁都係東京啦，四千幾都唔係好貴姐，咪當慶祝我哋拍拖三年半囉？」Mandy聽到呢句，即刻咀角含春咁樣，擺出佢僅僅仲有嘅幾秒矜持，然後話：「咁……好啦，嗱一次咁多架咋，下次唔准咁大洗架知嘛BB？」嘩，一個轉身射個三分波，唔講仲以為係我迫佢聖誕一齊去日本咁喎。

但其實，我真係好蠢、好蠢……當時嘅我無考慮到，所謂一闊三大 —— 機票都要四千幾，其他嘢又平得去邊呢？聖誕去得東京，都唔荒佢會肯貪平瞓膠囊酒店啦？又應該唔想正日喺街邊麵檔食拉麵架喇；慶祝大時大節好似又唔可以兩手揈揈……所以，一切還原基本步：靚酒店、高級日本餐廳食聖誕大餐，仲訂埋一大束玫瑰。

結果，一萬幾千當然落唔到樓啦。成個旅行，Mandy全程都無黑面，好滿意我嘅安排，佢亦睇唔出我俾錢嗰時嘅肉赤。搭飛機返香港嗰陣，佢，竟然，問我今次旅行總共洗咗幾多錢。

「唔……唔係好多姐。」我用盡畢生嘅功力嚟使出呢招強顏歡笑，講咗個數字俾佢聽。Mandy一聽到之後，嚇到花容失色，即刻開個計數機app出嚟係咁撳。最終都係要同我一樣，接受現實。

「對唔住呀，我無諗過會用咁多錢架。之後幾個月我哋慳啲洗丫？情人節都唔好出去慶祝喇，我親自下廚好無？」其實只要佢開心，洗幾多錢都係值得���

「但如果係為咗同人比較，啲錢就洗得好無謂囉。我同你過得開心咪得囉，唔洗專登做俾人睇嘅。不過今個聖誕我過得好開心，聖誕快樂！」同埋希望，Mandy下年聖誕仲記得自己講過咩啦……

———————————–

B612 - 只有小孩知道他們在尋找什麼。